ۇكىمەت اۋىل شارۋاشىلىعىنا ارنالعان جاڭا باعدارلامانى ماقۇلدادى
«جاقىندا «اگروبيزنەس - 2020» باعدارلاماسىنا وزگەرىس ەنگىزىلىپ، 2013-2017-جىلدارعا دەيىن قىسقارتىلدى. سونىڭ ورنىنا مينيسترلىك جاڭا مەملەكەتتىك باعدارلامانى ازىرلەدى. اتالعان باعدارلاما كەيىنگى 2017-2021-جىلداردى قامتيدى. بۇگىن ۇكىمەت ساعاتىندا ول باعدارلاما تانىستىرىلىپ قابىلداندى»، - دەيدى ە. احمەتوۆ.
مينيسترلىكتىڭ باسپا ءسوز قىزمەتى حابارلاۋىنشا، بۇگىن ۇكىمەت جاڭا باعدارلاما بويىنشا ارنايى قاۋلىنى قابىلداپ، ارى قاراي پرەزيدەنت اكىمشىلىگىنە جىبەردى. جالپى، جاڭا باعدارلاما اياسىندا اۋىل شارۋاشىلىعى ونىمدەرىن شىعارۋ كولەمى 1,3 ەسەگە ارتىپ، تابىستىڭ مولشەرى 3,3 تريلليوننان. 4,3 تريلليون تەڭگەگە دەيىن ارتادى دەگەن بولجام بار.
اگروونەركاسىپ سالاسىنداعى ءونىم وندىرۋشىلەردى مەملەكەتتىك قولداۋ دەڭگەيى 7 ەسەگە ۇلعايادى. نەگىزگى ماقسات - وتاندىق ونىمدەردى بارىنشا كوبەيتىپ، ىشكى نارىقتى تولتىرۋ. وسى ورايدا وتاندىق كاسىپورىنداردىڭ ءونىم وڭدەۋ كورسەتكىشىن بارىنشا ارتتىرۋ جوسپارلانعان. ول ءۇشىن جەرگىلىكتى جەردە كوورپەراتيۆتەر كوپتەپ قۇرىلادى.
ايتا كەتەيىك، قاراشانىڭ 29 ى كۇنى وتكەن ۇكىمەت وتىرىسىندا ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ 2017-2021-جىلدارعا ارنالعان اگروونەركاسىپ كەشەنىن دامىتۋ باعدارلاماسىن تانىستىرعان بولاتىن.
باعدارلاما اياسىندا استىق القاپتارىنىڭ كولەمىن 2,3 ميلليون گەكتارعا ازايتۋ جوسپارلانعان. وسىنىڭ ناتيجەسىندە جىل سايىن 3 ميلليون تونناعا از ءبيداي جينالاتىن بولادى. سەبەبى بۇگىندە ەلىمىزدە 2,9 ميلليون توننا ءبيداي ارتىلىپ قالىپ وتىرادى. ەندى، سونىڭ ورنىنا مايلى داقىلداردى كوپتەپ ءوسىرۋ كوزدەلىپ وتىر. ويتكەنى وسى ساناتتاعى ونىمدەردىڭ تاپشىلىعى بار.
ماسەلەن، ارپا (1,2 ميلليون توننا)، قانت قىزىلشاسى (1 ميلليون تونناعا جۋىق)، جۇگەرى جانە تاعى باسقا ءداندى-داقىلدارعا سۇرانىس جوعارى بولىپ تۇر. سونىڭ بارلىعى سىرتتان جەتكىزىلەدى. ال جاڭا باعدارلاما اياسىندا اتالعان ونىمدەردى وزىمىزدە ءوندىرىپ، ىشكى نارىقتى بارىنشا تولتىرۋ جوسپارلانعان.
بۇدان بولەك، ەت پەن ءسۇت ءوندىرىسىن دامىتۋ جۇمىسىنا باسا نازار اۋدارىلادى. ول ءۇشىن اۋىلدى جەرلەردە كووپەراتيۆتەردى كوپتەپ اشۋ جوسپارلانعان. «بۇگىنگى تاڭدا اۋىل شارۋاشىلىعى ونىمدەرىنىڭ 70-90 پايىزى قوسالقى شارۋاشىلىقتاردا وندىرىلەدى. ال ول ءونىمنىڭ ءبارى زاۋىتتارعا جەتكىزىلمەيدى. سونىڭ سالدارىنان قايتا وڭدەۋ كورسەتكىشى 30 پايىزدان اسپاي وتىر.
ماسەلەن، قازىر ەلىمىزدە 400 دەن استام قايتا وڭدەيتىن كاسىپورىن بار. ولاردىڭ بارلىعى تەك 20-60 پايىزعا عانا جۇمىس ىستەپ تۇر. سوندىقتان جاڭا باعدارلاما اياسىندا قايتا وڭدەۋدى ۇلعايتىپ، ىشكى نارىقتى دايىن ونىمدەرمەن بارىنشا تولتىرۋ جوسپارلانىپ وتىر.
ول ءۇشىن رەسپۋبليكا بويىنشا 1200 كووپەراتيۆ قۇرىلادى. ولار قايتا وڭدەۋگە قاجەتتى ءونىمدى دايارلايدى. ءبىزدىڭ ەسەبىمىزگە سايكەس، وسى شارالاردىڭ ارقاسىندا اۋىل حالقى ءوز ونىمدەرىن ساتىپ، شامامەن 300 ميلليارد تەڭگە كولەمىندە تابىس تابا الادى»، - دەيدى مىرزاحمەتوۆ.
ونىڭ ايتۋىنشا، جاڭا باعدارلاما اياسىندا مەملەكەت مال شارۋاشىلىعى سالاسىنىڭ تيىمدىلىگىن 40 پايىزعا، ال وسىمدىك شارۋاشىلىعىن 30 پايىزعا دەيىن ارتتىرماقشى. مينيسترلەر كابينەتى جاڭا باعدارلامانىڭ ەنگىزىلۋىن قولدادى. الايدا رەسمي تۇردە ماقۇلداعان ءجون. پرەمەر-مينيستر ب. ساعىنتايەۆ اتالعان قۇجاتتى تولىعىمەن پىسىقتاپ، جەلتوقسان ايىندا ماقۇلداۋدى ۇيعاردى. «جاڭا جىلدان باستاپ ءبىز جاڭا باعدارلاما بويىنشا جۇمىس ىستەۋىمىز كەرەك»، - دەدى ول.
اۆتور: ارمان اسقاروۆ
