ميلليارد قىتايدىڭ مەيىرىمىن وياتقان بەينەروليك
بەينەروليك تارالا سالا ميلليارت قىتاي كوزدەرىنە جاس الىپ، جۇرەكتەرىنە مەيىرىم ورناپ، ساحارانىڭ ءسانى بولعان جابايى اڭ-قۇستاردى قورعاۋدىڭ ءتۇرلى ايلا تاسىلدەرىن قاراستىرىپ جاتقان كورىنەدى.
بۇل ۆيدەونى كورگەندە شىنىمەن جۇرەگىڭىز اۋىرادى. وندا، اڭداردى تىرىدەي سويىپ، اياق-قولدارىن شاۋىپ، تەرىسىن سىپىرىپ جاتقانىن انىق كورۋگە بولادى.
مۇنى كورگەن قىتايدىڭ ايگىلى رەجيسسەرى فىڭ چياۋگاڭ، ايگىلى ايەل، كينو جۇلدىزى جانە ءانشىسى ليۋ روليڭ باستاعان تانىمال جۇلدىزدار تەرىدەن جاسالاتىن باعالى كيىمدەردى شەكتەۋدى دارىپتەپ ءجۇر ەكەن.
وسى بەينەروليكتى كورگەن تاعى ءبىر قىتاي ازاماتشاسى «بەيكۇنا جان يەسىنىڭ تەرىسى تىرىدەي سىپىرىلىپ الىندى. سول ساتتە سوڭعى رەت جانتالاسىپ، باسىن كوتەرىپ، ءوز دەنەسىنە قارادى. بۇل نەتكەن راحىمسىزدىق؟! تەرىسىنەن تىرىدەي ايىرىلعان جانۋار قايتا قاراۋعا باتا المادى. جانارىنان شاراسىزدىقتان جاس تامىپ، كوپ ۇزاماي ماڭگىلىككە اتتانىپ كەتە باردى. ەندى، مۇنداي جاۋىزدىقتى جاسامايىقشى»، دەپ جازادى.
ادەتتە اڭ تەرىلەرىنەن جاسالاتىن بۇيىمداردىڭ بارلىعى وسىنداي قاتىگەزدىكپەن كەلەتىنى جاسىرىن ەمەس. مۇنداي ايۋاندىق ارەكەتتەر ءبىزدىڭ ەلدە دە تولىپ جاتىر. وسىعان دەيىن، قاسقىردىڭ جانە ءيتتىڭ كۇشىكتەرىن تىرىدەي قول-اياعىن سىندىرعاندار، قويمەن كۇرەسكەن «بالۋاندارىمىز» وزدەرىنىڭ ارەكەتتەرىن الەۋمەتتىك جەلىگە جۇكتەپ، ماقتانىپ، ارتىنشا جازاعا تارتىلعان بولاتىن.
اڭ-قۇستاردى ايالايىقشى، اعايىن.
ەسكەرتۋ: بەينەروليكتە اڭدارعا قاتىگەزدىك كورسەتۋ ءساتى بەينەلەنگەن. سەزىمتال، جۇرەگى ناشار جاندارعا كورۋگە بولمايدى!
اۆتور: كۇنسۇلتان وتارباي
