روي دجونس لەۆيتتىڭ ريوداعى جەكپە-جەگىنە قاتىستى: الەمدىك بوكستاعى جەمقورلىق ءۇشىن ۇيالام

الماتى. قازاقپارات - الماتىعا جەكە ساپارىمەن كەلگەن داڭقتى بوكسشى كىشى روي دجونس الەمدىك بوكستاعى جەمقورلىق ءۇشىن قىنجىلاتىنىن ءبىلدىردى، دەپ حابارلايدى قازاقپارات ءتىلشىسى.

ايتا كەتەيىك، بۇعان دەيىن حابارلاعانىمىزداي (سىلتەمە) روي دجونس قازاقستانداعى كاسىپقوي بوكستىڭ دامۋىنا ۇلەس قوسۋ ءۇشىن كەلگەنىن ايتقان بولاتىن. ول 2017-جىلى كاسىپقوي بوكستا سوڭعى كەزدەسۋىن وتكىزۋى مۇمكىن.

«مەنى 2016-جىلى دا الەمدىك بوكستا جەمقورلىق جايلاعانى قاتتى قىنجىلتتى. مەنىڭشە، قاتەلىكتەر بولىپ تۇرادى، دەگەنمەن قاتەلىك جىبەردىڭ بە، قايتىپ ورالىپ، كەشىرىم سۇراۋ كەرەك دەپ ويلايمىن»، - دەدى روي دجونس قازاقستاندىق بوكسشى ۆ. لەۆيتتىڭ ريو وليمپياداسىندا «التىنسىز» قايتقان وقيعاسىنا قاتىستى ايتقان پىكىرىندە.

ەسكە سالا كەتەيىك، ريو وليمپياداسىندا ۆ. لەۆيت رەسەيلىك بوكسشى ەۆگەني تيشەنكومەن العاش اۋىر سالماقتا (91 كەلىگە دەيىن) قولعاپ ءتۇيىستىردى. رەسەيلىك بۇل جەكپە-جەكتە جەڭىسكە جەتكەنىمەن جانكۇيەرلەر داۋ تۋعىزعان بولاتىن. ەسكە سالايىق، ۆ. لەۆيتتىڭ كۇمىس العانىنا قاراماستان، قازاقستان ونى «التىن» العان سپورتشىلارمەن قاتار، تەڭ دارەجەدە ماراپاتتادى.

بۇنداي شەشىم ريوداعى تورەشىلەردىڭ ارەكەتىنە ريزا بولماعان قازاقستاندىق جانكۇيەرلەردىڭ تالابىنا بايلانىستى قابىلداندى. سىياقى دەمەۋشىلەر تاراپىنان جاسالدى. سونىمەن قاتار، لەۆيتكە استانا اكىمى دە جول تالعامايتىن كولىك مىنگىزگەن بولاتىن.

اۆتور: الماس مۇقاش ۇلى