قازاقستاندا ديەۆالۆاتسيا بولا ما
سوڭعى ءۇش ايدىڭ ىشىندە قور بيرجاسىندا دوللاردىڭ ساۋدا-ساتتىعى 2,5 ميللياردتان اسپاي وتىر. بيرجادان تىس نارىقتا، ياعني بانكتەر مەن اقشا ايىرباستاۋ بەكەتتەرىندە ساتىپ الىنعان جانە ساتىلعان دوللاردىڭ اراقاتىناسى كۇرت وزگەردى. ماسەلەن، قاراشا ايىندا قازاقستاندىقتار ا ق ش- تىڭ ۆاليۋتاسىن كوپ ساتىپ الماي، كەرىسىنشە، 46 ميلليون دوللارعا ارتىق اقشانى تەڭگەگە ايىرباستاپ جىبەرگەن. ال قور بيرجاسىندا العاشقى ون ايدىڭ ىشىندە ەكى ەسە از دوللار ساتىلعان. وتكەن جىلى 48 ميلليارد ساتىلسا، بيىل نەبارى 25 ميلليارد دوللار وتكەن ەكەن.
وسىلايشا، قازاقستانداعى ديەۆالۆاتسيالىق قاۋىپ-قاتەرلەردىڭ دەڭگەيى ءتۇسىپ وتىر. بانكتەر، بيزنەس پەن قاراپايىم حالىق دوللاردى ساتىپ الۋدىڭ ورنىنا كوپتەپ وتكىزىپ، ونىمەن ديەۆالۆاتسيانىڭ بولاتىنىنا سەنبەي وتىرعانىن كورسەتتى. وسىنىڭ ارقاسىندا ۇلتتىق بانكتە ۆاليۋتا باعامىن ۇستاۋ ءۇشىن جۇمساعان شىعىندارىن ازايتتى.
ءۇش اي بويى بانك بىردە-ءبىر ينتەرۆەنتسيا جاساعان جوق. ايتا كەتكەن ءجون، جىلدىڭ باسىندا ۇلتتىق بانك ۆاليۋتا باعامىنىڭ تەپە-تەڭدىگىن ۇستاۋ ءۇشىن ءبىراز اقشا جۇمساعان بولاتىن. اقپان-ماۋسىم ايلارىندا بانك 3,3 ميلليارد دوللاردى ساتىپ العان. بۇگىندە كونتراگەنتتەردىڭ «ديەۆالۆاتسيا بۇرق ەتە قالادى» دەگەن الاڭداۋشىلىعى دا باسىلدى. تەڭگە باعامىن ەركىن اينالىمعا جىبەرگەن كەزدە ناقتى نە بولاتىنىن ەشكىم بىلگەن جوق. سودان دۇربەلەڭ تۋىنداپ، دوللاردىڭ سپەكۋلياتسياسى كۇشەيگەن ەدى. سونىڭ سالدارىنان ۆاليۋتا نارىعىندا تۇراقسىزدىق بولدى.
اۆتور: ارمان اسقاروۆ
