تۇركىستانداعى ەسكى كەرۋەن جولدارى قالپىنا كەلتىرىلەدى
شاھاردىڭ تاريحي ورتالىعى 2 جوبا ارقىلى رەگەنەراتسيالانادى. سونداي-اق، وبلىستىق اكىمدىك قوجا احمەت ياسساۋي كەسەنەسى ماڭىنداعى 22 گەكتار جەردى ساتىپ الۋدى كوزدەپ وتىر.
جوبانىڭ قۇنى - 7 ميلليارد تەڭگە. بۇل تۋرالى مادەنيەت جانە سپورت ماسەلەلەرى جونىندەگى قوعامدىق كەڭەس وتىرىسىندا «قاز قايتا جاڭعىرتۋ» مەملەكەتتىك كاسىپورنى عىلىمي-زەرتتەۋ جانە جوبالاۋ فيليالى ديرەكتورىنىڭ مىندەتىن اتقارۋشى ءسادۋاقاس اعىتايەۆ مالىمدەدى، دەپ حابارلايدى Baq.kz ءتىلشىسى.
«تۇركىستان قالاسىنىڭ تاريحي ورتالىعىن رەگەنەراتسيالاۋ 2 جوبادان تۇرادى. 1-جوبا - ونىڭ قورعاۋ ايماعىنداعى جۇمىستار. ول تۇركىستان قالاسى اكىمدىگىنىڭ سۇراۋى بويىنشا اتقارىلۋدا. بۇل جوبانىڭ قۇنى - دايىندالعان سمەتا بويىنشا 1 ميلليارد 300 ميلليون تەڭگە.
نەگىزىندە بۇل جوبا 1970-جىلدارى ءسۇرىلىپ تاستالعان مادەني قاباتتى قايتا قالپىنا كەلتىرۋدى كوزدەيدى. تۇركىستانداعى كوپتەگەن مادەنيەت ەسكەرتكىشتەردى حالىق جاقسى بىلەدى. ءبىراق بىردە-ءبىر ەسكى تۇرعىن ۇيمەن تانىس ەمەس. سوندىقتان ءبىز 2 مىڭ جىلدىق تاريحى بار تۇركىستاننىڭ ۇيلەرى، كەرۋەن جولدارى قانداي بولدى دەگەن سۇراققا جاۋاپ بەرۋ ءۇشىن وسى جۇمىستى قولعا الدىق. 6-7 ءۇيدى قالپىنا كەلتىرەمىز. بۇل قورعاۋ ايماعىندا اتقارىلاتىن جۇمىستار. سونداي-اق، ەسكى كەرۋەن جولدارى قالپىنا كەلتىرىلەدى»، - دەدى ول.
ءسادۋاقاس اعىتايەۆتىڭ ايتۋىنشا، تۇركىستان قالاسىنداعى جوعالىپ كەتكەن ەسكى كەرۋەن جولدارى قايتادان قالپىنا كەلتىرىلەدى. وسىلايشا قالانىڭ ەسكى كۆارتالدارى دا جاڭعىرتىلماق. سونداي-اق، فيليال باسشىسى 2-جوبا بويىنشا قانداي جۇمىستار اتقارىلاتىندىعىن اتاپ ءوتتى.
«ال 2-جوبا تيكا ۇيىمىنىڭ سۇرانىسى بويىنشا قولعا الىنۋدا. جوبانىڭ قۇنى - 5-6 ميلليارد تەڭگە. ول قورعاننىڭ سىرتىنداعى قالاعا قاتىستى جەرلەر. ول ايماقتا تۇرعىن ۇيلەر مەن نىساندار بار. ۇسىنىس تۇركىستان قالاسى اكىمدىگى تاراپىنان ءتۇستى. جوسپار بويىنشا 22 گەكتار جەردى ساتىپ العالى وتىرمىز»، - دەدى ول.
ال مادەنيەت جانە سپورت ۆيتسە-ءمينيسترى اقتوتى رايىمقۇلوۆا اتالمىش جوباعا قارجى بيۋدجەتتەن عانا بولىنبەيتىندىگىن مالىمدەدى.
«جالپى جوباعا 7 ميلليارد تەڭگە قاجەت. قوعامدىق كەڭەس اتالمىش جوبانى تالقىلاۋدان وتكىزدى. قاراجات ماسەلەسىن ۇلتتىق ەكونوميكا مينيسترلىگى شەشەدى. ءبىراق جوعارىدا اتالعان 7 ميلليارد تەڭگەنىڭ بارلىعى مەملەكەت بيۋدجەتىنەن الىنبايدى. جوباعا قارجى جەرگىلىكتى بيۋدجەتتەن، حالىقارالىق دەمەۋشىلەردەن جانە مەملەكەت بيۋدجەتىنەن الىنادى»، - دەدى باسشى.
داۋرەن ەربولات
