قىتايدان ەۋروپاعا جۇك موڭعوليا ارقىلى تاسىمالدانا باستادى

استانا. قازاقپارات -  رەسەيلىك كومپانيا قىتايدان ەۋروپاعا قازاقستاندى اينالىپ وتەتىن جۇك تاسىمالداۋ ءدالىزىن ىسكە قوستى.

بۇل تۋرالى «ەۆروسيب» كومپانياسىنىڭ باسپا ءسوز قىزمەتى حابارلادى، دەپ جازادى abctv.kz.

موڭعوليا ارقىلى وتەتىن ترانزيتتىك كونتەينەرلىك سەرۆيس جاقىندا العاشقى رەيسىن جۇزەگە اسىرعان. قىتايدىڭ چۋنتسين پروۆينتسياسىنان 3- جەلتوقساندا شىققان كونتەينەرلەر موڭعوليا ارقىلى ەۋروپاعا 13 تاۋلىكتە جەتكەن.

«ەۆروسيب» كومپانياسى باسپا ءسوز قىزمەتىنىڭ حابارلاۋىنشا، گەرمانيانىڭ DB Cargo Russija تەمىرجول وپەراتورىمەن بىرلەسكەن جوبا 2017-جىلى تولىق كۇشىندە جۇمىس ىستەيتىن بولادى. اتاپ ايتقاندا قىتايدان ەۋروپاعا جۇك تاسىمالداۋ جيىلەپ، اپتاسىنا ءبىر پويىز جىبەرىلەدى.

موڭعوليا ارقىلى جۇك تاسىمالداۋدى «ەۆروسيب» بىلتىر باستاعان بولاتىن. قازىرگە دەيىن ەۋروپاعا 100 دەن استام پويىز قاتىناعان. قوسىمشا كۇش قاجەت بولدى ما، جاقىندا ولار بۇل جوبانى جۇزەگە اسىرۋ ءۇشىن نەمىستىڭ DB Cargo Russija تەمىرجول وپەراتورىمەن بىرلەستى.

ەسكە سالايىق بۇعان دەيىن ەۋروپاعا جۇك تاسىمالداۋدا قازاقستان نەگىزگى ءدالىز بولىپ كەلگەن ەدى.