كورەرمەندەرگە «ورتەكە» مۋلتفيلمى جول تارتپاق

استانا. قازاقپارات - استانا قالاسىندا انيماتسيامەن كاسىبي اينالىساتىن ورتالىق جۇمىس ىستەپ جاتىر.

قۇرىلعانىنا ءالى ءبىر اي بولماعان انيماتسيالىق ورتالىق بۇل كۇنى بىرنەشە 3D فورماتىنداعى مۋلتفيلمدەردى جاساۋدى باستاپ كەتكەن ەكەن.

«استانا قالاسىنداعى قازاق ۇلتتىق ونەر ۋنيۆەرسيتەتىندەگى (شابىت) وقۋىمدى اياقتاپ، قازاق فيلمنىڭ «جەرۇيىق» فيلمىنىڭ تۇسىرىلىمىنە قاتىسقان ەدىم. كەيىن قىتايعا بارىپ، بىرنەشە انيماتسيالىق كومپانيالاردا جۇمىس ىستەدىم. سول كەزدە قىتايداعى قازاق جاستارىنىڭ تۋىندىسى - «ابايدىڭ بالالىق شاعى» مۋلتفيلمىنىڭ العاشقى سەريالارىن جاساۋعا اتسالىستىم»، - دەدى ورتالىق ديرەكتورى قاسيەت ساحيوللا ۇلى قازاقپارات تىلشىسىنە بەرگەن سۇحباتىندا.

«ورتالىقتىڭ ماماندارىنىڭ كوپشىلىگى - قىتايدان كەلگەن جوعارى بىلىكتى قازاق جاستارى. ولار قىتايداعى بەيجىڭ، ءۇرىمجى قالالارى جانە انحوي پروۆينتسياسىندا انيماتسيا ماماندىعى بويىنشا ءبىلىم الىپ، بىرنەشە جىل قىتايلىق كومپانيالاردا جۇمىس ىستەگەن. انيماتسيا سالاسىنىڭ ءار قىرىن مەڭگەرگەن وسى جاستاردى بىرىكتىرىپ، قازاقشا مۋلتفيلمدەردى دامىتۋ ءۇشىن استانا قالاسىندا «Qazart media» ورتالىعىن اشتىق. الداعى ۋاقىتتا ساپالى قازاقشا مۋلتفيلمدەر دايىندايتىن بولامىز»، - دەپ اتاپ ءوتتى قاسيەت ساحيوللا ۇلى.

ورتالىق ديرەكتورى 3D فورماتىنداعى «ورتەكە» اۆتورلىق مۋلتفيلمىنىڭ جاقىن ارادا جارىق كورەتىنىن، سونىمەن قاتار كينوفيلم ەففەكتىلەرىن جاساۋمەن اينالىسۋدى كوزدەپ وتىرعانىن دا جەتكىزدى. «ورتەكە» تاۋەلسىز قازاقستانداعى العاشقى مۋزىكالىق انيماتسيا بولماق.

اۆتور: مۇحتار قاليموللا ۇلى