تالدىقورعان ماڭىندا اپاتقا ۇشىراعان ۇشقىش ادىلبەك ىسقاقوۆ ەكسكليۋزيۆتى سۇحبات بەردى
وقيعا كەشكى التىلار شاماسىندا بولعان. ابىروي بولعاندا ۇشقىش زارداپ شەككەن جوق. گوسپيتالدەن بۇگىن تولىقتاي تەكسەرىلىپ، وتباسىنا ورالدى. «بولعان وقيعانى راديوبايلانىس ارقىلى ورتالىققا جەتكىزدىم. بىردەن شۇعىل تۇردە ۇشاقتى قالانىڭ ۇستىنەن جانە جاقىن ورنالاسقان اۋىل ايماقتاردان امان الىپ شىقتىم. ءوزىم قارعىپ ءتۇسۋ ءادىسىن قولداندىم. سونىڭ ارقاسىندا امان قالدىم. ۇشاق ەڭ باستىسى قۇلاعاندا ەشكىمگە زيان تيگىزگەن جوق. دەنەمە ەشقانداي زاقىم كەلمەدى. ەلىمدى جاقسى كورەمىن، جەرىمدى جاقسى كورەمىن، قازاقستان ەلىم ءۇشىن ەڭبەك ەتە بەرەمىن»، - دەيدى ساناۋلى سەكۋندتاردا دۇرىس شەشىم قابىلداي بىلگەن ۇشقىش، مايور ادىلبەك ىسقاقوۆ.
ادىلبەك ىسقاقوۆ ش ق و، ماقانشى وڭىرىندە 1985-جىلى دۇنيەگە كەلگەن. وتباسىن قۇرعان. ءبىر قىزدىڭ اكەسى. اسكەري سالادا قىزمەت ىستەپ جۇرگەنىنە 10 جىلدان استى. ال ۇشاقپەن ۇشىپ جۇرگەنىنە 12 جىلداي بولدى دەيدى، ول.
ادىلبەك وتباسىندا ەكى بالا. وزىنەن كەيىن 1991-جىلعى قارىنداسى بار. اناسى بولعان جايتتى ەستىگەن كەزدە بىردەن ەسەڭگىرەپ قالعانىن جەتكىزدى. «ادىلبەكتىڭ اكەسى بىلتىر قايتىس بولدى. ارۋاعى قولدادى دەپ بىلەمىن. ۇلىمنىڭ اپاتقا ۇشىراپ، امان قالعانىن ەستىگەندە بىردەن قۇرباندىق شالدىق. قازىر ءوزىم الماتى قالاسىندا تۇرامىن» دەيدى ادىلبەكتىڭ اناسى كۇلاش ماديحانوۆا.
ەستەرىڭىزگە سالا كەتەيىك، 21- جەلتوقسان كۇنى تالدىقورعان ماڭىندا اسكەري ۇشاق تۇنگى جاعدايدا وقۋ ۇشۋىن ورىنداۋ كەزىندە اۆياتسيالىق قاقتىعىستىڭ سالدارىنان سۋ-27 ۇشاعى اپاتقا ۇشىرادى.
ۇشقىش مايور ا. ىسقاقوۆ بارىنشا كۇش-جىگەرىن سالىپ، ۇشاقتى ەلدى مەكەننەن ءارى قاراي بۇرىپ جىبەردى. ودان كەيىن قارعىپ ءتۇسۋ ءادىسىن قولداندى. قاقتىعىستىڭ سەبەپتەرى مەن ءمان-جايىن ق ر قورعانىس ءمينيسترى تاعايىنداعان كوميسسيا انىقتاۋدا.
اۆتور: سامال قابىشەۆا
