سىلەۋسىننىڭ وزىمەن بىردەي بالىق اۋلاعان ءساتى ۆيدەوعا ءتۇسىپ قالدى - كەسكىن

استانا. قازاقپارات - ا ق ش ۇلتتىق ساياباقتارىنىڭ بىرىندە جيرەن سىلەۋسىن وزىمەن بىردەي ۇلكەن بالىقتى اۋلادى.

رەيندجەرلەر وقيعانى ۆيدەوعا ءتۇسىرىپ ۇلگەردى. «وليمپيك» ۇلتتىق ساياباعى (Olympic National Park) وليمپيك تۇبەگىندە، ۆاشينگتون شتاتىنىڭ سولتۇستىك- باتىسىندا ورنالاسقان. تۇبەكتىڭ ۇزاق مەرزىم بويى وقشاۋلانۋىنان مۇندا وزىندىك فلورا مەن فاۋنا قالىپتاستى.

وندا جيرەن سىلەۋسىن Lynx rufus تىرشىلىك ەتەدى. بۇل مىسىق تۇقىمداس جىرتقىش قويان، قوي، قۇستار، بالىقتار، ءتىپتى كىشىگىرىم اكۋلالارعا دەيىن اۋلاپ، كۇن كورەدى، دەپ جازدى nat-geo.ru.

كۇزدە «وليمپيك» ساياباعىندا اقسەركەنىڭ ۋىلدىرىق شاشۋ ناۋقانى باستالادى. رەيندجەر لي سنۋك (Lee Snook) ارىپتەستەرىمەن بىرگە بالىقتاردىڭ جاپپاي توپتاسقان ورىندارىن كورۋگە اتتاندى. پاركتىڭ ءبىر بۇرىشىندا جەمتىگىن تورۋىلداعان جاس سىلەۋسىندى بايقاعان رەيندجەر دەرەۋ كامەراسىن قوسادى. وسىلايشا، بالىق اۋلاۋ وقيعاسىن تاسپاعا ءتۇسىرىپ العان.