جارىلعان ايفوننان زارداپ شەككەن اقتوبەلىك قىز وقيعانىڭ ءمان-جايىن ايتىپ بەردى

استانا. قازاقپارات - بىرنەشە كۇن بۇرىن اقتوبەلىك قىز ۇيالى تەلەفونى جارىلىپ، اۋرۋحاناعا تۇسكەن بولاتىن.

سول ۋاقىتتا تەلەفوننىڭ ماركاسى جايلى ەشتەڭە ايتىلماعان. ەندى «دياپازون» گازەتى وقيعانىڭ ءمان- جايىن انىقتادى.

سويتسەك، زارداپ شەككەن قىز 28 جاستاعى ارداق ورىنباساروۆا بولىپ شىقتى. ول باسىلىم تىلشىلەرىنە iPhone 5S سمارتفونىنان كۇيىپ قالعانىن ايتىپ بەردى: «ويانىپ كەتپەسەم، ءولۋىم دە مۇمكىن ەدى».

بەتى، قولى، اياعى جانە ارقاسى كۇيگەن قىز 18 -جەلتوقساندا اۋرۋحاناعا تۇسكەن. ءبىر تاۋلىك بويى ول جانساقتاۋ بولىمىندە جاتقان، ال كەلەسى كۇنى تراۆماتولوگيا بولىمىنە اۋىستىرىلىپتى.

«ءورت بولعان كۇننەن بەرى ۇيىقتاي المايمىن. اۋىرسىنامىن، ونىڭ ۇستىنە جارىق تۇسسە، ءورت ەلەستەيدى. سويلەۋ قيىن، ىستان سولاي بولىپ قالدى»، - دەيدى زارداپ شەككەن قىز.

«بۇل وقيعا تۇنگى 3.00 شاماسىندا بولدى. ۇيقى الدىندا iPhone-دى قۋات كوزىنە قوستىم دا، جانىما قويدىم، توسەگىم ەكى ادامدىق. تاڭعا جۋىق ەرتە تۇرۋىم كەرەك بولدى دا، ۇيالى تەلەفوننىڭ وياتارىن قوستىم. ءتۇننىڭ ءبىر ۋاقىتىندا بىرەۋ مەنى يتەرگەندەي بولدى. ويانىپ كەتتىم. قاراسام - توسەگىمنىڭ ەكىنشى بولىگى جانىپ جاتىر، بولمە تۇتىندەپ كەتكەن. ايعايلاعىم كەلدى، كومەك سۇراعىم كەلدى، داۋسىم شىقپايدى، ءتۇتىن جۇتىپ قويعانمىن. ءبىرىنشى قاباتتان اكەم جۇگىرىپ كەلدى، ءبىراق ەسىكتى بىردەن اشا المادى، قۇلىپتالىپ قالىپتى. مەنى كوشەگە الىپ شىقتى، ءوزىم 102-گە قوڭىراۋ سوقتىم. بولمەم، iPhone، تونىم، نوۋتبۋگىم ورتەنىپ كەتتى. ءالى كۇنگە دەيىن ەسىمدى جيا الار ەمەسپىن»، - دەيدى ارداق.

ونىڭ ايتۋىنشا، iPhone 5S سمارتفونىن ول 2015 -جىلى اعايىندى جۇبانوۆتار كوشەسىندە ورنالاسقان Vokk سالونىنان ساتىپ الىپتى.

«ءۇش اي بويى 60 مىڭ تەڭگە جينادىم، قالعان 60 مىڭ تەڭگەسىن نەسيەمەن راسىمدەدىم. ءوزىم فيتنەس- ورتالىقتا جۇمىس ىستەيمىن، الەۋمەتتىك جەلىدە "لۋچ نادەجدى" دەگەن توپتى جۇرگىزەمىن، قايىرىمدىلىقپەن اينالىسامىن. ميني- فۋتبولدان تۋرنيرلەر وتكىزەمىز، تۇسكەن قاراجاتتى قارتتار ۇيىنە، جايسان ينتەرناتىنداعى بالالارعا، بالالار ۇيىنە، انا ۇيلەرىنە بەرەمىز. مەن ءاردايىم بايلانىستا بولۋىم قاجەت، ساپالى سۋرەت كەرەك، سوندىقتان iPhone ساتىپ الۋىم كەرەك بولدى. جارناماسىندا قاۋىپسىز دەپ جازىلعان ەدى. بىزگە ەشقانداي دا قاۋىپسىزدىك كەپىل ەتىلمەيدى. تەلەفوندى باراحولكادان، بىرەۋ- مىرەۋدەن ساتىپ العان جوقپىن، ۇيالى بايلانىس سالونىنان الدىم»، - دەيدى قىز.

ول ەندى ەمىنە جۇمسالاتىن قاراجاتتى ءوندىرۋ ءۇشىن سالونعا شاعىم تۇسىرمەكشى. «120 مىڭ تەڭگەنى iPhone ءۇشىن بەردىم، تونىم، توسەگىم، نوۋتبۋگىم ورتەندى، كەم دەگەندە 20 كۇن اۋرۋحانادا جاتامىن، جازىلعان سوڭ پلاستيكالىق وتا جاساۋىم كەرەك شىعار. كۇن سايىن 6 مىڭ تەڭگەگە ءدارى ساتىپ الامىن. تاياۋ ۋاقىتتا جۇمىسقا شىعا المايمىن. بۇعان كىم جاۋاپ بەرەدى؟ ءيا، ءتىرى قالعانىم ءۇشىن قۋانىشتىمىن، تۇگەلدەي ورتەنبەگەنىم ءۇشىن، ءبىراق مەنىڭ شىعىنىم باستان اسادى. ءبىر تانىسىمنىڭ iPhone 5S سمارتفونى كوزىنشە ورتەنىپ كەتتى. ول ەشكىمگە ەشتەڭە ايتپاي- اق، جاڭاسىن ساتىپ الدى. ءبىراق، مەنىڭ ويىمشا، زارداپ شەككەندەر باس قوسىپ، ءوز قۇقىعىن قورعاۋى كەرەك»، - دەپ مالىمدەدى ول.

دارىگەرى نۇرلان ابىشەۆتىڭ ايتۋىنشا، ارداقتىڭ دەنەسىنىڭ 30 پايىزى كۇيىپ قالعان، كۇيىك ەكىنشى جانە ءۇشىنشى دارەجەلى، سونداي-اق، ول تۇتىنگە تۇنشىعىپ قالعان. دەرمازين جاقپا مايى تەگىن پرەپاراتتار تىزىمىنە كىرمەيدى، سوندىقتان قىز ونى ءوز قالتاسىنان ساتىپ الۋى كەرەك.

«ۇيالى تەلەفونى جارىلىپ، بىزگە ءتۇسىپ جاتقان ءبىرىنشى ناۋقاس، - دەيدى دارىگەر. - بارلىق تانىسىنا اباي بولۋعا كەڭەس بەرىپ جاتىرمىز».

ال Vokk ۇيالى بايلانىس سالونىنداعىلار "دياپازون" تىلشىسىنە جاعدايدى شەشۋگە دايىن ەكەنىن ايتىپتى. «ۇيالى تەلەفوننىڭ قانداي جاعدايدا ورتەنگەنىن انىقتاۋ كەرەك. جوندەۋ جۇمىستارى بولعان با، ءتۇپنۇسقا قۋاتتاعىش قۇرىلعىنى پايدالاندى ما، قانداي ۋاقىتتا قۋاتتاعانى. تۇندە قۋاتتاۋ كەڭەس ەتىلمەيدى. قۋاتى 100 پايىزدان اسقاننان كەيىن، باتارەيى ءىسىنىپ كەتۋى مۇمكىن. بۇل Samsung تەلەفوندارىندا دا بار اقاۋ. ءتىپتى ءتۇپنۇسقا قۇرىلعىنى پايدالانسا دا، وسىنداي اقاۋ شىعۋى مۇمكىن»، - دەپتى مەكەمە اكىمشىسى سەرگەي.