حالىقارالىق بوكس قاۋىمداستىعى استاناداعى بوكستان الەم چەمپيوناتىن جىل وقيعاسى دەپ اتادى
ناگرادانى شۆەيتسارياداعى جىل قورىتىندىسىنا ارنالعان ارنايى كەزدەسۋدە قازاقستان بوكس فەدەراتسياسىنىڭ اتقارۋشى ديرەكتورى بەكجان بەكتەنوۆكە AIBA تابىستادى.
جۇزدەسۋ بارىسىندا ۇيىمداستىرۋشىلىقتىڭ جوعارى دەڭگەيى، بارىس ارەناداعى كەرەمەت شوۋ مەن جوبانىڭ جاقسى جۇزەگە اسىرىلعاندىعى اتاپ ءوتىلدى. استاناداعى الەم چەمپيوناتىنا 65 ەلدەن كەلگەن 295 سپورتشى قاتىستى، دەپ حابارلايدى قازاقستان بوكس فەدەراتسياسىنىڭ باسپا ءسوز قىزمەتى.
«بۇل تەك 2016-جىلداعى عانا ەمەس، سونداي-اق ايەلدەر بوكسىنىڭ 15 جىلدىق تاريحىنداعى ۇزدىك چەمپيونات، - دەدى AIBA ايەلدەر كوميسسياسىنىڭ ءتوراعاسى دجويس بوۋەن. - مەن قازاقستاننىڭ بارلىق قاتىسۋشىلارعا دەگەن قوناقجايلىعىنا، ۇيىمداستىرۋشىلىق دەڭگەيىنە ءتانتى بولدىم. قازاقستان بوكس فەدەراتسياسىنىڭ وسى ناگرادامەن ماراپاتتالعانىنا قۋانىشتىمىن. باسقا دا ۇلتتىق فەدەراتسيالارعا ۇلگى بولاتىنىنا سەنىمدىمىن». جىل قورىتىندىسى بويىنشا وزبەكستاننان الەم چەمپيونى حاسانبوي دۋسماتوۆ پەن ۇلى بريتانيادان نيكولا ادامس ۇزدىك بوكسشى دەپ تانىلدى.
AIBA بيىلعى جىلى جاڭا سىيلىقتى «اڭىزعا اينالعان بوكسشىلار» - Legends Award بەكىتتى. اتالمىش سىيلىققا براحيم اسلۋم، ۆلاديمير كليچكو مەن مەري كوم يە بولدى.
ماراپاتتاۋ سالتاناتىنا قازاقستاننان AIBA ۆيتسە-پرەزيدەنتتەرى تيمۋر قۇلىبايەۆ، سەرىك قوناقبايەۆ، ق ب ف اتقارۋشى ديرەكتورى بەكجان بەكتەنوۆ، ق ب ف حالىقارالىق بايلانىس جونىندەگى ۇيلەستىرۋشى دينارا بولاتبەك قىزى قاتىستى.
