قىتاي ءانشىسى الەمدىك دەڭگەيدەگى جۇلدىزعا اينالۋى مۇمكىن - فوتو، كەسكىن
دجەين چجان (Zhāng Liàngyǐng)- قىتايدىڭ مەگا جۇلدىزى، ال سوڭعى ءانى وعان قىتايدان شىققان ءبىرىنشى الەمدىك سۋپەرجۇلدىز بولۋعا مۇمكىندىك بەرەدى، دەپ جازادى باسىلىم.
ماقالا اۆتورىنىڭ حابارلاۋى بويىنشا، دجەين چجان ەڭ العاش 2005 -جىلى قىتاي تەلەارنالارىنىڭ بىرىندە وتكەن Super Girl ءان بايقاۋىندا ەكىنشى ورىن الىپ، ۇلكەن ساحناعا اياق باسقان. ول ءوزىنىڭ ۆوكالدىق دياپازونىمەن كوپشىلىكتى تاڭعالدىرىپ، «نوتا دەلفينى» دەپ اتالىپ كەتتى. ال قىتاي ەلىندە بۇل سلەنگ جوعارى نوتالاردى الا الاتىندارعا قاتىستى ايتىلادى ەكەن. بۇل ءانشىنىڭ حالىقارالىق دەڭگەيدە تانىلۋىنا مۇمكىندىگى مول. سەبەبى ول اعىلشىن تىلىندە اندەر جازدىرادى. ءبىر كەزدەرى وپرا ۋينفريدىڭ شوۋىنا دا قاتىسقان ەكەن.
چجاننىڭ «Dust My Shoulders Off» اتتى سوڭعى ءانى وعان الەمدىك دەڭگەيدەگى تانىمالدىلىققا قول جەتكىزۋگە سەپتىگىن تيگىزە الادى. سونىمەن قاتار دجەين چجان كەلەسى جىلى ساۋىردە اعىلشىن تىلىندەگى العاشقى البومىن دا جارىققا شىعارماق. سول كەزدە دە بۇل ترەكتىڭ ماڭىزدى ءرول وينايتىنى ءسوزسىز. سەبەبى قازىر بۇل ءاننىڭ بەينەكليپى YouTube ۆيدەوحوستينگىندە 6,5 ميلليونعا جۋىق قارالىپ، ITunes دياگرامماسىندا العاشقى بەستىككە كىرگەن. تومەندەگى بەينەكليپتە ءانشى تانىمال ونەر تۋىندىلارىنا پاروديا جاسايدى.
«مەن قىتاي ءانشىسىمىن. ءبىراق بۇل ءان اعىلشىن ءتىلدى اۋديتورياعا ارنالعان. ال ۆيدەونى ءارتۇرلى مادەنيەت وكىلدەرى تۇسىنەتىن مازمۇندا ءتۇسىرۋ كەرەك بولدى»، دەيدى چجان bbc - گە بەرگەن سۇحباتىندا. ونىڭ ايتۋىنشا، بۇل ۆيدەو 48 ساعاتتىڭ ىشىندە تۇسىرىلگەن.
«ءتۇسىرىلىم كەزىندە ماعان قايتا- قايتا بويانۋعا تۋرا كەلدى. ارينە، ماكياجدى كەتىرۋ قيىن. ءبىز ءتۇسىرىلىمدى بىتىرگەن كەزدە مەنىڭ بەتىم ءىسىپ كەتتى»، - دەيدى ءانشى. ءبىراق بۇل ۆيدەو قىتايلىقتار تاراپىنان سىنعا ۇشىراعانىن داي ايتا كەتۋ كەرەك. سوعان بايلانىستى بەينەبايان رەجيسسەرى تايۆاندىق لياو دجەن شۋاي «جۇلدىزدار مۋزىكالىق كليپتەردە ءبي بيلەپ، ادەمى، تارتىمدى بولعانىنىڭ سوكەتتىگى جوق»، دەيدى.
«مەن وعان كورەرمەندەر سەنى كورىپ، وزدەرىن ەستەرىنە الۋى كەرەك. ولارعا سەنىڭ ەرجۇرەك ءانشى ەكەنىڭدى، جاڭاشىلدىققا بارا الاتىنىڭدى كورسەتكىم كەلەدى دەپ ايتتىم. سەبەبى امەريكالىق نارىققا شىعۋ ءۇشىن مۇنىڭ ماڭىزى زور»، دەيدى ول.
كوپتەگەن ماماندار بۇل جاعداي قىتايلىقتاردىڭ دا باتىس مۋزىكا يندۋسترياسىنا كىرەتىن ۋاقىتى جەتكەنىن كورسەتەدى مە دەگەن سۇراق توڭىرەگىندە پىكىرتالاستار ءوربىتىپ ءجۇر.
«حالىقارالىق ساراپشىلارعا اسەر ەتۋ وتە قيىن. بۇل تاريحي قالىپتاسقان جاعداي»، دەيدى مۋزىكا يندۋسترياسىنداعى ميديا مەديا- كونسالتينگتىك فيرما ساراپشىسى مارك مالليگان. ونىڭ ايتۋىنشا، بۇل مۋزىكا اعىنى حالىقارالىق ارتىستەرگە جول اشتى. ءتىپتى، كەيبىر اعىلشىن تىلىندە ءان سالاتىن شۆەد مۋزىكانتتارىنا دا ساتتىلىك اكەلدى. ءبىراق ونىڭ ەكىنشى جاعى دا بار.
«بۇل امەريكالىق ستيلگە ۇقسايدى»، دەپ قوستى ول. ال چجاننىڭ كوپتەگەن اندەرى باللادا، ياعني ەموتسيالىق قويىلىمدارعا كوپتەپ كەلەدى.
قىتايداعى EMI حالىقارالىق كومپانيانىڭ ۆيتسە- پرەزيدەنتى دجواننا حۋان ءار ءانشى ءوزىنىڭ ەرەكشە قاسيەتتەرىمەن تانىلۋى كەرەك دەپ ەسەپتەيتىنىن ايتىپتى. «باتىس جۇلدىزدارىنان كوشىرىپ الۋ مىندەت ەمەس»، دەيدى ول. ونىڭ ايتۋىنشا، ازيانىڭ دىبىس جازۋ كومپانيالارى حالىقارالىق نارىققا شىعۋعا تالاي رەت تالپىنعان، اعىلشىن تىلىندە البومدار دا شىعارعان. ءبىراق ونىڭ تيىمدىلىگى از بولىپتى. ول ءۇشىن دجواننا ەرەكشە مادەني ەلەمەنتتەردى مۋزىكاعا قوسۋ كەرەك دەپ ەسەپتەيدى. مىسال رەتىندە مامان ءۇش قىزدان تۇراتىن Babymetal جاپون تريوسىن كەلتىرگەن. «بۇل توپ وزدەرىنىڭ مۋزىكا نارىعىنا ارناپ ءان جازسا دا، باتىس اۋديتورياسى ولاردى جاقسى قابىلدادى»، - دەيدى ول.
وسى رەتتە مۋزىكالىق يندۋستريا ينسايدەرلەرى چجانعا ءدال قازىر دۇرىس ستراتەگيا تاڭداۋ كەرەك دەپ وتىر. «قىتاي انشىلەرى باتىس اۋديتورياسىن باعىندىرۋى ءۇشىن تەلەارنالارعا شىعىپ، زاماناۋي مۇمكىندىكتەردى پايدالانىپ، ينتەرنەت قوسىمشالاردى دا قولدانعانى ءجون» ، دەيدى مالليگان. ال حۋان قىتاي تەحنولوگياسىنىڭ دامۋ مۇمكىندىكتەرىن ەسكەرە وتىرىپ، كوڭىل كوتەرۋ سالاسى مەن بولاشاق فيلمدەرگە ءان جازۋ دا تانىمالدىلىققا جول اشادى دەپ ەسەپتەيدى. ءبىر ايتا كەتەرلىگى، چجان The Great Wall بلوكباستەرىنىڭ جارناما ءانىن ورىندايدى ەكەن.
وسى ماسەلەگە قاتىستى پىكىر بىلدىرگەن كوپتەگەن ساراپشىلار قىتايدا شىعارىلاتىن تەحنولوگيالارعا مىندەتتى تۇردە سول ەلدىڭ انشىلەرىنىڭ ترەكتەرىن ەنگىزۋ كەرەك دەپ ەسەپتەيدى. ال دجواننا حۋان «سوڭعى ءجۇز جىلدا قىتاي تىلىندە ءان سالاتىن انشىلەردە الەمدىك مۋزىكا نارىعىنا شىعۋعا مۇمكىندىكتەر بولعان جوق»، دەپ وتىر.
egemen.kz
