انكارادا اندرەي كارلوۆپەن قوشتاسۋ ءراسىمى ءوتتى

استانا. قازاقپارات - اندرەي كارلوۆ رەسەي مەن تۇركيا دوستىعىنىڭ سيمۆولىنا اينالدى.

بۇل تۋرالى تۇركيانىڭ ۆيتسە-پرەمەرى تۋگرۋل تيۋركەش انكارانىڭ حالىقارالىق اۋەجايىندا وتكەن وسى ەلدەگى ر ف ەلشىسى اندرەي كارلوۆپەن قوشتاسۋ راسىمىندە ايتتى، دەپ حابارلادى Anadolu اگەنتتىگى.

«بۇل قىلمىستى ۇيىمداستىرعان ادامدار كارلوۆتى ولتىرگەن جوق. ولار ونىڭ اتىن تاريحتا قالدىردى»، - دەدى تيۋركەش.

ونىڭ ايتۋىنشا، اندرەي كارلوۆ انكارادا بولعان جىلدارى ەكى مەملەكەت اراسىندا قيىن كەزەڭدەر وتكەن.

«كارلوۆ تۇركيادا ەلشى بولىپ جۇرگەن كەزدەرى رەسەي- تۇرىك قارىم- قاتىناسى وتە ۇلكەن سىناقتاردان ءوتتى. ءبىراق ءبىز ەكى ەلدىڭ باسشىلارىنىڭ ارقاسىندا ولاردىڭ بارلىعىنان وتتىك. بۇعان كارلوۆتىڭ دا سىڭىرگەن ەڭبەگى بار»، دەدى تيۋركەش.

ۆيتسە-پرەمەر انكارادا بولعان جاعدايدى رەسەي مەن تۇركيا قاتىناسىنا سىزات تۇسىرگىسى كەلگەندەردىڭ ءىسى دەپ باعالادى. ال تۇركيانىڭ سىرتقى ىستەر مينيسترلىگى بۇل قىلمىستى تەرگەۋ جۇمىستارى جان- جاقتى جۇرگىزىلەتىنىن ايتتى.

ەستەرىڭىزگە سالا كەتسەك، رەسەيدىڭ تۇركياداعى ەلشىسى اندرەي كارلوۆقا قاستاندىق جاسالىپ، ول اۋىر جاراقاتتان قازا تاپقان بولاتىن.