اقمولالىق وقۋشىلار قازاقستاندىق ۇلتتاردىڭ اندەرىن ورىنداۋدان سايىستى - فوتو
بايقاۋ باعدارلاماسىنا ساي قازاقستاندا تۇراتىن ءتۇرلى ۇلتتاردىڭ حالىقتىق اندەرى ورىندالدى.
قاتىسۋشىلارعا «اقمولا وبلىسىنىڭ ورىس قوعامى» ق ب ءتوراعاسى الەكساندر ارتەمەنكو، قازاقستان حالقى اقمولا اسسامبلەياسى حاتشىلىعىنىڭ مەڭگەرۋشىسى مارال جاقىپوۆا، قازاقستان حالقى اقمولا اسسامبلەياسى جانىنداعى انالار كەڭەسىنىڭ مۇشەسى ولگا زەمسكوۆا، كوكشەتاۋ قالاسىنىڭ بالالار مۋزىكالىق مەكتەبىنىڭ وقىتۋشىسى ساۋلە كوكىشەۆا جانە «اقمولا وبلىسىنىڭ ورىس قوعامى» ق ب ءان ستۋدياسىنىڭ جەتەكشىسى يرايدا پەرمياكوۆا قازىلىق ەتتى.
قازىلار القاسىنىڭ شەشىمىمەن «تۋعان جەر» ءانىن ناقىشىنا كەلتىرىپ ورىنداعان كوكشەتاۋ قالالىق №2-ورتا مەكتەپتىڭ وقۋشىسى، توعىز جاستاعى داريا ساپاروۆا باس جۇلدەگەر اتاندى.
ءبىرىنشى ورىن «اسسالاۋماعالەيكۋم!» ءانىن كەرەمەت شىرقاعان №14-ورتا مەكتەپتىڭ وقۋشىسى جاسۇلان ءالىبي مەن «تۋعان جەر» ءانىن ورىنداعان №13-مەكتەپتىڭ وقۋشىسى ۆەنەرا شاكەتوۆاعا بەرىلدى. بايقاۋدىڭ ەكىنشى جۇلدەلى ورنىنا №11-ورتا مەكتەپتىڭ وقۋشىسى ۆەرا روجكوۆاعا مەن №2-مەكتەپتىڭ وقۋشىسى دارىن باقىتكەلدى لايىق دەپ تانىلدى. ال №13-ورتا مەكتەپتىڭ «جۇلدىز» تريوسى جانە №4-مەكتەپتىڭ «سامۇرىق» كۆينتەتى شىعارماشىلىق بايقاۋدىڭ ءۇشىنشى ورنىنا يە بولدى. سونىمەن قاتار ۆيكتوريا گرۋدينا جانە دانا امانجولوۆانىڭ جوعارى دارەجەدە ورىندالعان اندەرىن ايتىپ وتكەن ءجون.
ءان بايقاۋىنىڭ بارلىق قاتىسۋشىلارى ديپلومدارمەن جانە باعالى سىيلىقتارمەن ماراپاتتالدى. «قوعامدىق كەلىسىم» ك م م- نىڭ قولداۋىمەن جانە «اقمولا وبلىسىنىڭ ورىس قوعامى» قوعامدىق بىرلەستىگىنىڭ ۇيىمداستىرۋىمەن وتكەن شارانىڭ ماقساتى - جاس دارىنداردى انىقتاۋ، بالالار مەن جاسوسپىرىمدەردىڭ شىعارماشىلىعىن قولداۋ، اقمولا وبلىسىندا تۇراتىن بارلىق ەتنوستاردىڭ ۇلتتىق مادەنيەتى مەن ءتىلىن دامىتۋ، ولاردى قايتا وركەندەتۋ، ۇلتارالىق كەلىسىم مەن تولەرانتتىق قاتىناستى ناسيحاتتاۋ جانە دوستىقتى نىعايتۋ.
اۆتور: اسلان وسپانوۆ
