جەزقازعاندا التىن وندىرەتىن كاسىپورىن اشىلدى
«جالتىربۇلاق» كەن ورنى قازىر 150 ادامدى جۇمىسپەن قامتىدى. جاڭا زاۋىتتىڭ ىسكە قوسىلۋى ماڭايىنداعى ەلدى مەكەندەردىڭ دە ينفراقۇرىلىمىن جاقسارتۋعا سەپ بولماق. 2010 -جىلدان بەرى جۇرگىزىلگەن گەولوگيالىق بارلاۋ جۇمىستارى ناتيجەلى بولىپ، قۇرامىندا التىن بار كەن تابىلدى. قازىر كاسىپورىن سول باعالى مەتالدى اشىق ادىسپەن ءوندىرۋدى قولعا الدى. قاراعاندى وبلىسىنىڭ كاسىپكەرلىكتى قولداۋ كارتاسىنا ەنگىزىلگەن جوبانىڭ جالپى قۇنى - 3,4 ميلليارد تەڭگە.
سەرگەي ۆەرپەتا، «جالتىربۇلاق» ا ق فيليالىنىڭ ديرەكتورى:
- ءبىز 2017 -جىلى دورە زاۋىتىنىڭ قۇرىلىسىن جوبالاپ، سالۋدى كوزدەپ وتىرمىز. بۇل بىزگە قازاقستان نارىعىنا ءونىم شىعارۋعا مۇمكىندىك بەرەدى. ول 999 سىنامالى التىن نەمەسە دورە قۇيماسى بولادى.
الداعى ۋاقىتتا كاسىپورىن جىلىنا 1 تونناعا دەيىن التىن ءوندىرۋدى جوسپارلاپ وتىر. كەندى وڭدەپ، التىندى ايىرىپ العاننان كەيىن دورە قۇيماسى الىنادى. ايتا كەتۋ كەرەك، جاڭا زاۋىتتىڭ قۇرىلىسى وسى اۋماقتاعى شارۋالارعا دا ءتيىمدى بولماق.
باتىرلان احمەتوۆ، جەزقازعان قالاسىنىڭ اكىمى:
- قاراعاندىدان كاسىپورىنعا دەيىن جاڭا جول سالىنادى. بۇل مىنا جاقتاعى فەرمەرلەردىڭ جاقسى جولمەن جۇرۋىنە مۇمكىندىك بەرەدى. جانە توق جۇيەسى دە تارتىلعان، كەلىسىم بويىنشا جەرگىلىكتى فەرمەرلەر دە توق الىپ وتىرادى.
جاڭا كاسىپورىن 150 ادامدى ەڭبەكپەن قامتىدى. جۇمىسشىلار ءۇشىن مۇندا بارلىق الەۋمەتتىك جاعداي جاسالعان.
24.kz
