ءتۇتىن كەسىرىنەن استانادان كەلگەن ۇشاق بەيجىڭ اۋەجايىنا قونا المادى

استانا. قازاقپارات - بۇگىن بەسىنشى كۇن بەيجىڭدى بوزعىلت ءتۇتىن تۇمشالاپ تۇر.

قىتاي استاناسى مەن ونىڭ ماڭايىنداعى قالالاردا قاۋىپتىڭ قىزىل ءتۇسى جاريالاندى.

وسى ءتۇنى اۋەجايدا تۇك كورىنبەي، استانا- بەيجىڭ باعىتىندا ۇشقان ك س 227 رەيسى بەيجىڭگە قونا الماي، ءبىرشاما شالعاي جاتقان حۋح-حوتو قالاسىنىڭ اۋەجايىنا قونۋعا ءماجبۇر بولدى. ءتۇتىن سەيىلسە، بورتىندا قازاقستان ازاماتتارى بار بۇل رەيس كەشكە قاراي قىتاي استاناسىنا قايتا ۇشىپ بارۋى مۇمكىن. قازىر بەيجىڭ عانا ەمەس، حىبي جانە حىنان پروۆينسياسىندا دا ءدال وسىنداي جاعداي. زياندى قالدىقتار تۇمشالاعان قىتايدىڭ 20 قالاسىندا ەسكەرتۋدىڭ قىزىل ءتۇسى جاريالاندى. كەشە اۋانىڭ لاستانۋى ەلدىڭ سولتۇستىگىندە وتە قاۋىپتى دەڭگەيگە جەتكەن. دۇنيەجۇزىلىك دەنساۋلىق ساقتاۋ ۇيىمىنىڭ مولشەرى بويىنشا PM 2,5 دەپ اتالاتىن زياندى قالدىق 1 كۋب مەترگە 25 ميكروگرامم بولۋى كەرەك.

ال قازىر بەيجىڭدە بۇل كورسەتكىش 331 دەن اسىپ كەتكەن. ءتىپتى قىتاي استاناسىنىڭ ىرگەسىندەگى حىبي پروۆينسياسىنىڭ اكىمشىلىك ورتالىعى شيجياجۋندا بۇل كورسەتكىش 1000 ميكروگرامعا جەتكەن. بىرنەشە كۇننەن بەرى قالا كوشەلەرىندە ادەتتەگىدەي كوپ ادام جوق. ەسكەرتۋگە بايلانىستى ۇيدەن شىعۋعا بولمايدى.

جولدىڭ ناشار كورۋىنە بايلانىستى كولىك قوزعالىسى شەكتەلگەن. جاۋ نان، بەيجىڭ قالاسىنىڭ تۇرعىنى:

- بيلىك «ءبىر بەلدەۋ، ءبىر جول» دەگەن سياقتى جوبالاردى ىسكە اسىرامىز دەپ قول استىنداعى حالقىنىڭ تۇرمىس- تىرشىلىگىن ۇمىتىپ كەتكەن سياقتى. قازىر حالىق اۋانىڭ لاستانۋىنا قاتتى الاڭداۋلى. ۇكىمەتىمىز وسى ماسەلەنى تەز ارادا شەشسە جاقسى بولار ەدى.

ۆان يۋشيان، بەيجىڭ قالاسىنىڭ تۇرعىنى:

- مۇنداي كۇندەرى سىرتتا كوپ جۇرمەۋگە تىرىسامىز. ۇيدە اۋا تازارتقىش قوسىپ وتىرامىز. ازىرگە وسىدان باسقا قانداي دا ءبىر ساقتانۋ شارالارى جوق. مەن وتباسىمنىڭ دەنساۋلىعى ءۇشىن الاڭدايمىن، لاس اۋا تەزىرەك سەيىلسە ەكەن دەيمىن.

بۇگىن تۇندە استانا- بەيجىڭ باعىتى بويىنشا ۇشىپ كەلگەن رەيس قويۋ ءتۇتىننىڭ كەسىرىنەن قونا المادى. ۇشاق ىشكى موڭعوليا اۆتونومدى ولكەسىنىڭ حۋح-حوتو قالاسىنا بارۋعا ءماجبۇر بولدى. «بورتىندا نەگىزىنەن قازاقستان ازاماتتارى بار ك س227 رەيسى ءالى حۋح- حوتو قالاسىندا، جوسپار بويىنشا ەگەر ءتۇتىن سەيىلسە، كەشكە قاراي قىتاي استاناسىنا ورالادى»، - دەيدى دەلەگاتسيا قۇرامىنداعى ارسەن تۇرعانبايەۆ.

سونداي-اق، بەيجىڭ اۋەجايىنان دا وزگە باعىتتارعا رەيستەر كەيىنگە شەگەرىلدى. بەيجىڭ عانا ەمەس، كورشىلەس جاتقان تيانجين قالاسىندا كەشەلى بەرى 131 رەيس كەيىنگە شەگەرىلىپ، 75 ۇشاق اۋەگە كوتەرىلە الماعان.




24.kz