14:34, 20 - جەلتوقسان 2016 | GMT +5
الماتىدا الەمدىك كلاسسيكا مەن قازاق كومپوزيتورلارىنىڭ تانىمال اندەرى شىرقالدى
الماتى. قازاقپارات - ەل تاۋەلسىزدىگىنىڭ 25 جىلدىعىندا قۇرمانعازى اتىنداعى قازاق ۇلتتىق كونسەرۆاتورياسىندا «ۇلى دالا سازى» مەرەكەلىك كونسەرتى ءوتتى، دەپ حابارلايدى قازاقپارات.
اتالعان كونسەرۆاتوريا سوليستەرى مەن ۇجىمى قازاق كومپوزيتورلارى مەن الەمدىك كلاسسيكانىڭ تانىمال اندەرىن شىرقادى. سونىمەن قاتار، وتان، ماحاببات تۋرالى اندەردى دە ورىنداپ، كورەرمەن كوڭىلىنەن شىقتى.
«ۇلى دالا سازى» مەرەكەلىك كەشىن شاڭ-قوبىز ءانسامبلىنىڭ كوركەمدىك جەتەكشىسى، «مادەنيەت سالاسىنىڭ ۇزدىگى» گۇلفايرۋز دالباعاي اشتى.
ديريجەر يان رۋدكوۆسكيدىڭ جەتەكشىلىگىمەن كونسەرۆاتوريانىڭ ارالاس حورى قازاقستاندىق كومپوزيتور ا. ءابدىنۇروۆتىڭ «قۋىرماش»، و. حروموۆانىڭ «وتان» شىعارمالارىن ورىندادى.
سونداي-اق، كەشتە سكريپكاشىلار ءانسامبلى مەن قوبىزشىلار، جەتىگەنشىلەر جانە باياندا كۇي تارتىسقان شەبەرلەرمەن قاتار، حالىقارالىق جانە رەسپۋبليكالىق بايقاۋلاردىڭ جەڭىمپازدارى مارينا التۋحوۆا، اننا مەلنيكوۆا، نۇربولات يسايەۆ پەن ەرعالي اعايداروۆتار ونەر كورسەتتى.
