قازاقستاننىڭ شەتەلدەگى ەلشىلىكتەرى ق ر ۇلتتىق قاۋىپسىزدىك قىزمەتىنىڭ كۇزەتىنە الىنۋى مۇمكىن

استانا. قازاقپارات - ەلىمىزدىڭ شەتەلدەگى ەلشىلىكتەرى ق ر ۇلتتىق قاۋىپسىزدىك قىزمەتىنىڭ كۇزەتىنە الىنۋى مۇمكىن.

بۇگىن ق ر پارلامەنتى سەناتىندا حالىقارالىق قاتىناستار، قورعانىس جانە قاۋىپسىزدىك كوميتەتىنىڭ وتىرىسىندا «قارسى بارلاۋ قىزمەتى تۋرالى» زاڭ جوباسىن تالقىلاۋدان كەيىن ۇلتتىق قاۋىپسىزدىك كوميتەتى ءتوراعاسىنىڭ ورىنباسارى مارات قالقابايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«ەلشىلىك رەسمي تۇردە تەك اۋعانستاندا عانا (ق ر ۇ ق ك شەكارا قىزمەتى) كۇزەتىلەدى. جاقىندا بولعان تەراكت (تۇركياداعى) ءتيىستى شارانى قابىلداۋ قاجەت ەكەنىن بايقاتىپ وتىر»، - دەدى ول تىلشىلەر ساۋالىنا جاپ بەرۋ كەزىندە.

وسى رەتتە ول شەتەلدە ديپلوماتيالىق وكىلدىكتى كۇزەتكە الۋ تۋرالى ماسەلە وڭايلىقپەن شەشىلمەيتىنىن ءتۇسىندىردى.

«قاۋىپتىلىك دەڭگەيىنە قاراي ەلىمىزدىڭ باسقا ەلشىلىكتەرىندە كۇزەتپەن قامتاماسىز ەتۋ مۇمكىندىگى بار. ازىرگە، تۇركيادا وسىنداي كۇزەت جايىندا الدىن الا ايتا المايتىن، دەگەنمەن دە بۇل ماسەلەنى قاراستىرامىز»، - دەدى قالقابايەۆ.

بۇدان بۇرىن حابارلانعانداي، بۇگىن ۇكىمەتتىڭ وتىرىسىنان كەيىن باق وكىلدەرىنە سۇحبات بەرگەن قر سىرتقى ىستەر ءمينيسترىنىڭ ورىنباسارى ەرجان اشىقبايەۆ قازاقستاننىڭ شەتەلدەگى ەلشىلىك قىزمەتكەرلەرىنىڭ قاۋىپسىزدىگى كۇشەيتىلەتىنىن ءمالىم ەتتى.

«ارينە، ءتيىستى تاپسىرمالار بەرىلدى. شەتەلدە جۇمىس ىستەپ جۇرگەن ديپلوماتتارىمىزدىڭ قاۋىپسىزدىگى ءبىرىنشى ورىندا تۇر. ءبىزدىڭ ديپلوماتيالىق وكىلدىكتەرىمىزدىڭ قاۋىپسىزدىگى جونىندەگى جۇمىس تۇراقتى تۇردە جۇرگىزىلەدى. بۇل تەك تۇركياعا عانا بايلانىستى ەمەس. دۇنيەجۇزىندەگى ەلشىلىكتەرىمىزگە دە قاتىستى. الەمدەگى احۋالدى بىلەسىزدەر. تەك تۇركيادا ەمەس، ەۋروپا ەلدەرىندە دە، ازيا ەلدەرىندە دە بولىپ جاتقان تەرروريستىك اكتىلەرگە قارسى ءتيىستى شارالار قولدانىلادى»، - دەدى اشىقبايەۆ.

سونىمەن قاتار رەسەي ەلشىسى اتىپ ولتىرىلگەن جەردە قازاقستان ەلشىلىگىنىڭ قىزمەتكەرلەرى بولعان-بولماعاندىعى بەلگىسىز. دەگەنمەن بۇل جايتقا قاتىستى ول ەلىمىزدىڭ سىرتقى ىستەر مينيسترلىگى تاراپىنان تيىسىنشە تۇسىنىكتەمە بەرىلەتىندىگىن ايتتى. ەسكە سالا كەتسەك، رەسەي ەلشىسى 19- جەلتوقسان كۇنى انكارادا «رەسەي كالينينگرادتان كامچاتكاعا دەيىن» اتتى كورمەنىڭ اشىلۋىندا ءسوز سويلەۋ بارىسىندا اتىپ ءولتىرىلدى.

اۆتور: رۋسلان عابباسوۆ