پۋتين رەسەي ەلشىسىنە جاسالعان قاستاندىقتىڭ ارتىندا كىم تۇرعانىن تابۋدى تاپسىردى

استانا. قازاقپارات - رەسەي پرەزيدەنتى ۆلاديمير پۋتين رەسەيدىڭ تۇركياداعى ەلشىسى اندرەي كارلوۆقا قاستاندىقتى كىم جاساعانىن جانە ونىڭ ارتىندا كىم تۇرعانىن ءبىلۋى ءتيىس دەپ مالىمدەدى.

بۇل تۋرالى «ازاتتىق» حابارلايدى.

ول سونىمەن قاتار قاستاندىققا بايلانىستى قىلمىستىق ءىس قوزعالعانىن، رەسەي ماماندارى انكاراعا ءىستى تەرگەۋگە قاتىسۋ ءۇشىن جىبەرىلەتىنىن ايتتى.

پۋتيننىڭ باسپا ءسوز حاتشىسى دميتري پەسكوۆتىڭ سوزىنە قاراعاندا، پرەزيدەنت قاستاندىقتان سوڭ سىرتقى ىستەر ءمينيسترى سەرگەي لاۆروۆ، سىرتقى بارلاۋ قىزمەتىنىڭ باسشىسى سەرگەي نارىشكين جانە فەدەرالدىق قاۋىپسىزدىك قىزمەتىنىڭ باسشىسى الەكساندر بورتنيكوۆپەن جيىن وتكىزگەن. پۋتين ەلشىگە قاستاندىقتى سيريا داعدارىسىن رەتتەۋگە كەدەرگى جاساۋ ارەكەتى دەپ اتاعان.

بۇعان دەيىن رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ماسكەۋ ەلشىنى ءولتىرۋدى تەراكت دەپ باعالايتىنىن مالىمدەگەن.

تۇركيا بيلىگى رەسەي ەلشىسىن اتقان ادامنىڭ بۇرىن انكارادا ارنايى ماقساتتاعى پوليتسيا جاساعىندا جۇمىس ىستەگەنىن راستادى. ول قاستاندىقتان سوڭ پوليتسيامەن اتىستا وققا ۇشقان.

اندرەي كارلوۆ انكارادا 19- جەلتوقسان كۇنى كەشكە قازىرگى زامان ونەر گالەرەياسىندا «تۇرىكتەر كورگەن رەسەي» دەپ اتالاتىن فوتوكورمەدە سويلەپ تۇرعاندا ەر ادامنىڭ تاپانشادان اتقان وعىنان قازا تاپقان.

شابۋىلدان تاعى ءۇش ادام جەڭىل جارالانعان.