پروكۋراتۋرانىڭ ارالاسۋىمەن اقساي قالاسىنىڭ اكىمى قىزمەتىنەن بوساتىلدى

ورال. قازاقپارات - پروكۋرورلىق قاداعالاۋ اكتىسىنە سايكەس اقساي قالاسىنىڭ اكىمى ايىمگۇل ءتىرىجانوۆا قىزمەتىنەن بوساتىلدى، دەپ حابارلايدى قازاقپارات ءتىلشىسى.

 ب ق و پروكۋراتۋراسىنىڭ باسپا ءسوز قىزمەتىنەن تۇسكەن مالىمەتكە قاراعاندا، ا. تىرىجانوۆانىڭ بيىلعى 14 - قىركۇيەكتە اتالمىش قىزمەتكە ارنايى تەكسەرۋسىز، زاڭسىز تاعايىندالعانى بەلگىلى بولدى.

 ا. ءتىرىجانوۆا بۇدان بۇرىن ءبورلى اۋداندىق ءبىلىم بەرۋ ءبولىمىنىڭ باسشىسى قىزمەتىن اتقارعان كەزدە سىبايلاس جەمقورلىق قۇقىق بۇزۋشىلىعىن جاساعانى ءۇشىن اكىمشىلىك جاۋاپكەرشىلىككە تارتىلعان. اتاپ ايتقاندا، ءبورلى اۋداندىق مامانداندىرىلعان اكىمشىلىك سوتىنىڭ 2015 -جىلعى 27  - ناۋرىزداعى قاۋلىسىمەن ا. ءتىرىجانوۆا ق ر اكىمشىلىك قۇقىق بۇزۋشىلىق كودەكسىنىڭ 535-بابىنا (زاڭسىز كاسىپكەرلىك قىزمەتپەن اينالىسۋ جانە زاڭسىز تابىس تابۋ) سايكەس ايىپتى دەپ تانىلىپ، وعان 792,8 مىڭ تەڭگە ايىپپۇل سالىنعان. قولدانىستاعى زاڭناماعا سايكەس مەملەكەتتىك قىزمەتكە قابىلدانعانعا دەيىن ءۇش جىل مەرزىمدە سىبايلاس جەمقورلىق قۇقىق بۇزۋشىلىعىن جاساعانى ءۇشىن سوت تارتىبىمەن اكىمشىلىك ايىپپۇل سالىنعان ازامات مۇنداي قىزمەتكە قابىلدانا المايدى.

 اۆتور: ەلجان ەرالى