اۋەزوۆ اڭگىمەلەرىندەگى ايەل وبرازدارى

نۇر- سۇلتان. قازاقپارات - حالقىمىزدىڭ زاڭعار جازۋشىسى اۋەزوۆ تۋراسىندا ءسوز بولعاندا، ونىڭ ەپوپەياعا دەيىن دە وتە شەبەر جازۋشى بولعاندىعىن انىق ايتا الامىز.

قازاق ادەبيەتىندە اۋەزوۆتىڭ قولىنان شىققان دۇنيەگە سىني كوزقاراستان گورى قىزىعۋشىلىق تانىتقاندار وتە كوپ بولدى.

جازۋشى جاساعان ايەلدەر گالەرەياسى الەم ادەبيەتىندەگى ەشقانداي وبرازداردان ارتىق بولماسا كەم ەمەس. «اۋەزوۆ ءتىلى - تەك ونىڭ شىعارمالارىندا عانا ەمەس - بۇكىل قازاق پروزاسىنىڭ، قالا بەردى قازاق ادەبيەتىنىڭ قان تامىرىنا تاراپ كەتكەن. ويتكەنى ءبىزدىڭ بۇگىنگى ادەبي ءتىلىمىزدى قالىپتاستىرۋدا ودان ءىرى تۇلعا بولعان ەمەس. سوندىقتان دا اۋەزوۆتەن ءتىپتى ءستيلى بولەك جازۋشىلاردىڭ ءوزى وسى الىپ ءتىل سيقىرشىسىنىڭ تاجىريبەسىنەن اتتاپ كەتە العان جوق»، - دەيدى تاحاۋي احتانوۆ.

شىن مانىندە جازۋشىنىڭ ۇلتىنا دەگەن سۇيىسپەنشىلىگى ءار تۋىندىسىنان اڭعارىلادى. قازاق ايەلدەر گالەرەياسىن جاساۋ ۇردىسىندە اۋەزوۆتىڭ الار ورنى بولەك. ويتكەنى ول جاساعان ايەل وبرازى بارىنشا شىنايى. قازاق ايەلىنىڭ بولماسىن، قازاق قىزىنىڭ بولماسىن، قازاق اناسىنىڭ بولماسىن ءبىتىم-بولمىسى وبرازدىق تۇرعىدا شەبەر سۋرەتتەلەدى. قالاي؟

سەبەبى، قازاق ايەلى قانشالىقتى قايسار بولسا، سونشالىقتى جانى نازىك. قانشالىقتى قايعىعا دەس بەرەرلىك شىدامدى بولسا، سونشالىقتى تاۋقىمەتتەن كوز اشپاعان سورلى. قانشالىقتى ەركىندىگى جوق بولسا، سونشالىقتى اسقان اقىل يەسى.

دەرەكتەرگە سۇيەنسەك، جازۋشىنىڭ ەپوپەيادا 200 گە تارتا ايەلدەر وبرازىنىڭ جيىنتىعىن كوركەم سۋرەتتەگەنىن بىلەمىز. دەسە دە، ەپوپەياعا دەيىنگى اڭگىمەلەرىندەگى باستى كەيىپكەرلەردىڭ تاعدىرى دا تاسادا قالماعانى بەلگىلى.

ەندەشە، اۋەزوۆ اڭگىمەلەرىندەگى ايەل وبرازىنا زەر سالايىق.

قاراگوز - «قارالى سۇلۋداعى» قارالى كەلىنشەك. بۇل كوشتە جالعىز جۇدەۋ، جالعىز جابىرقاعان، قايعىنىڭ تۇساۋىندا كەلە جاتقان - سول قاراگوز... مىنا دىردۋلى كوشتىڭ باسشىسى بولعان - جالىز جەسىر ايەل قاراگوز.

اۆتوردىڭ كەلىنشەكتى سۋرەتتەۋىنىڭ استارىندا جالعىزدىق كونتسەپتسياسى، قايعى-مۇڭ شەڭبەرى، سونىمەن قاتار قازاق ايەلىنىڭ تۇتاس بەينەسى ءبىر وبرازعا سىيىپ كەتكەندەي.

اۋەزوۆ شىعارمالارىندا كەيىپكەرلەردىڭ ەسىمدەرى قايتالانۋى ءجيى ورىن الادى. وقىرمان ءۇشىن ءبىر كەيىپكەردىڭ باسىنان وتكەن سان قيلى تاعدىردىڭ ءتۇيىنى بولىپ كورىنۋى دە مۇمكىن. بۇل وزىندىك قۇپيا.

عازيزا - «قورعانسىزدىڭ كۇنىندەگى» قورعانسىز سۇلۋ. عازيزا... ول - سىپايى، نازىك بولىپ وسكەن عازيزا. كورگەن كەزدە كورەر كوزگە العاشقى جەردەن-اق سۇيكىمدىلىگىن سەزدىرەتىن ۋىز جاس.

جاس باسىنا ورناعان قايعى، جۇرەگىن جەگەن دەرت سىرتىنا شىعىپ تۇر. بۇل جەردەگى سۇلۋلىقتىڭ استارىنا ۇلى قايعىنى جاسىرىپ قويعان دا جازۋشى شەبەرلىگى.

ءرابيعا - «قىر سۋرەتتەرىندەگى» كەلىنشەك بەينەسى. جەتىمسىرەگەن ەلسىز دالادا جالعىز كەلە جاتقان جاياۋ - زۇلىمدىق، زورلىقتان قاشقان جاس كەلىنشەك ءرابيعا.

مەزگىلسىز شىققان جاس ايەلدىڭ الدىنداعى تىلەگى - بوستاندىق، اقىرعى ءۇمىتى - جالعىز باۋىرى مۇقاش. بۇلاردان بولەك اۋەزوۆ جاساعان سۇلۋ دا سىرباز ايەلدەر بەينەسى ەپوپەيانىڭ ءون بويىندا تۇنىپ تۇر.

جازۋشىنىڭ العاشقى پەساسى - «ەڭلىك-كەبەك» بولسا، تۇڭعىش تۋىندىسى «ادامدىق نەگىزى - ايەل». ءدىلدا، ۇلجان، ايگەرىمنەن بولەك، توعجان، سالتانات بەينەلەرى دە ءوز الدىنا كوركەم وبرازدار.

اۆتور جاساعان ءار كەيىپكەردىڭ بولمىس-ءبىتىمى بىرەۋدىڭ ەت جاقىنىنىڭ بەينەسى ىسپەتتەس. سۋرەتكەردىڭ ۇتقىرلىعى دا وسى جەردەن اڭعارىلادى. ايەل وبرازىن شەبەر سۋرەتتەۋ ءۇشىن ايەل جان-دۇنيەسىن، ونىڭ پسيحولوگياسىن، ومىرگە كوزقاراسىن، كۇيزەلىسى مەن قۋانىشىن سەزىنە ءبىلۋ شارت.

اۆتور ءوز تاجىريبەسىندە بۇل قاعيدانى بۇلجىتپاي ورىنداي بىلگەن بىردەن-ءبىر جازۋشى. قورىتا كەلگەندە، باستاۋىن «ادامدىق نەگىزى - ايەلدەن» باستاعان جازۋشى گالەرەياسىن تۇتاس ءداۋىردىڭ تولىق جيىنتىعىن ايەل بەينەسىمەن ادەمى سۋرەتتەگەن. اۋەزوۆ ارلەگەن ايەلدەر وبرازى سول ءۇشىن دە قۇندى.

Massaget.kz