سيريا بيلىگى سودىرلاردىڭ حيميالىق قارۋ قولدانعانىن دالەلدەيتىن ايعاقتار كەلتىردى

استانا. قازاقپارات - سيريا بيلىگى حيميالىق قارۋعا تىيىم سالۋ ۇيىمىنىڭ حالىقارالىق ميسسيا وكىلدەرىنە سودىرلاردىڭ يپريت حيميالىق زاتتەگىن قولدانعانىن دالەلدەيتىن ايعاقتاردى كورسەتتى.

بۇل تۋرالى ر ي ا نوۆوستي اگەنتتىگى حيميالىق قارۋعا تىيىم سالۋ كونۆەنتسياسىن جۇزەگە اسىرۋ جونىندەگى سيريا ۇلتتىق ورگانىنىڭ رەسمي وكىلى ساممەر ابباسقا سىلتەمە جاساپ حابارلادى.

«حالىقارالىق ميسسيا ءبىز كورسەتكەن بارلىق قۇجاتتاردى تەكسەردى جانە قابىلدادى. ميسسيا وكىلدەرى ساراپتاماعا جىبەرەتىن سىنامالاردى الۋ ءۇشىن سيرياعا تاعى دا كەلەدى»، - دەدى ول.

ر ف قورعانىس مينيسترلىگىنىڭ ساراپشىلارى 2016-جىلدىڭ 31- قازانىندا اللەپو پروۆينتسياسىنىڭ افرين اۋدانىندا ورنالاسقان ماررەت-ۋمم-حاۋش ەلدى مەكەنىندە يپريتپەن جاراقتانعان 240 ميلليمەترلىك مينومەت ميناسىنىڭ قولدانىلعانى جايلى ايعاقتار جينادى، دەپ ناقتىلاي ءتۇستى ۇلتتىق ۇيىم وكىلى.

ميسسيا تەكسەرۋ جۇمىستارىن ۇيىمداستىرۋ ءۇشىن تەك قۇجاتتىق ايعاقتاردى قابىلدادى، ال ماتەريالدىق ايعاقتار (سىنامالار - رەد.) مورلەنىپ، گااگاعا چارتەرلىك رەيسپەن جەتكىزۋ جونىندە قارجىلىق قيىندىقتار شەشىلگەنشە سيريالىقتارعا ساقتاي تۇرۋعا بەرىلدى. سىنامالار شامامەن 2017-جىلدىڭ قاڭتار ايىندا جەتكىزىلۋى مۇمكىن.

ميسسيا سيريا بيلىگىنىڭ رەسمي ءوتىنىمى بويىنشا داماسكىدە 12- جەلتوقساننان باستاپ جۇمىس ىستەدى. ونىڭ قۇرامىندا - ا ق ش،  ۇلى بريتانيا، اۆستراليا، سلوۆاكيا جانە سلوۆەنيادان كەلگەن سەگىز ينسپەكتور بار. ايعاقتاردى قابىلداعان ميسسيا وكىلدەرى ازىرگە ەشقانداي پىكىر بىلدىرگەن جوق.