ستۋدەنتتەر قازاقستاننىڭ عارىش كارتاسىن جاسايدى

استانا. قازاقپارات - «گەودەزيا جانە كارتوگرافيا» ماماندىعى بويىنشا ءبىلىم الىپ جاتقان س. سەيفۋللين اتىنداعى قازاق اگرارلىق ۋنيۆەرسيتەتىنىڭ ستۋدەنتتەرى عارىش تۇسىرىلىمدەرىنىڭ راسترلىق نەگىزدەرىن قۇراۋ بويىنشا ارنايى بريگادالاردا جۇمىس ىستەۋدە.

بۇل تۋرالى «قازاقپارات» ح ا ا تىلشىسىنە گەواقپاراتتىق جۇيەلەر ورتالىعىنىڭ ديرەكتورى فارابي ەرمەكوۆ ايتتى.

«ءبىر اي بۇرىن 1-4- كۋرس ستۋدەنتتەرى اراسىندا ۇران تاستالدى. ساباقتان تىس ۋاقىتتا ماماندىق بويىنشا جۇمىس جۇرگىزەتىن بريگادا قۇرامىز. الداعى ۋاقىتتا اقىلى جۇمىس كولەمىن الۋعا تىرىسامىز. تيىسىنشە، بالالاردىڭ ماماندىق بويىنشا اقشا تابۋ مۇمكىندىگى بار، ولار ستۋدەنتتىك جىلدارىندا ەڭبەك كىتاپشاسىن الا الادى. بۇعان بىردەن 200 ستۋدەنتتىڭ 120 سى جازىلدى»، - دەپ اتاپ ءوتتى ف. ەرمەكوۆ.

ستۋدەنتتىك بريگادا - اشىق پايدالانۋداعى عارىش تۇسىرىلىمدەرىنەن قازاقستاننىڭ راسترلىق نەگىزىن قۇرۋ مىندەتىن تاڭدادى. ستۋدەنتتەر 15 بريگادامەن 59000 پاراق كارتا جۇكتەدى.

«ەندى بىزگە كومپيۋتەرلىك سىنىپتاردان ستۋدەنتتەردى قۋۋعا تۋرا كەلەدى. 37 كومپيۋتەردە تاۋلىكتەپ جۇمىس جاسالادى. دەرەكتەر اعىنىن قابىلداپ ۇلگەرمەي جاتىرمىز. قازىر بىزدە عارىش تۇسىرىلىمدەرىنىڭ بازاسى بار! ەڭ باستىسى - ستۋدەنتتەردىڭ قۇلشىنىسى كەرەمەت»، - دەپ اسەرىمەن ءبولىستى ورتالىقتىڭ ديرەكتورى.

كوپتەگەن عىلىمي جانە پراكتيكالىق باستامالار ۇسىنعان فارابي ەرمەكوۆتىڭ ايتۋىنشا، بۇل ەكسپەريمەنتكە باسقا دا مامانداردى تارتۋ قاجەت، سوندا تەتىكتىڭ قۋاتى ون ەسەگە ارتادى. بۇل جاستاردىڭ ستۋدەنت كەزىنەن باستاپ زاماناۋي عارىش تەحنولوگيالارىن پايدالانىپ، ەلدىڭ اۋقىمدى جوبالارىنا قاتىسۋىنا ىقپال ەتەدى.