ەردوعان كايسەريدەگى تەراكتىگە كىم قاتىسى بولۋى مۇمكىن ەكەندىگىن ايتتى

استانا. قازاقپارات - تۇركيادا قىزمەتىنە تىيىم سالىنعان كۇردىستاننىڭ جۇمىسشى پارتياسى كايسەري قالاسىندا بولعان تەراكت ءۇشىن جاۋاپتى، دەلىنگەن ەل پرەزيدەنتى رەجەپ تايپ ەردوعاننىڭ سەنبى كۇنگى جازباشا مالىمدەمەسىندە.

وسىعان دەيىن تۇركيا باس شتابى اسكەريلەرگە قارسى كايسەريدە بولعان تەراكت تۋرالى حابارلاعان بولاتىن. مينا قويىلعان كولىك قىزمەتتەن بوساتىلعان سولداتتار مەن ەفرەيتورلار كەتىپ بارا جاتقان اۆتوبۋستىڭ جانىندا جارىلىپ، 13 ادام مەرت بولدى، 55 ادام دەنە جاراقاتىن الدى.

تۇركيا پرەمەر-ءمينيسترى بينالي يىلدىرىم تەراكتىنى جانكەشتى-سودىر جۇزەگە اسىرعاندىعىن مالىمدەدى، دەپ حابارلادى ر ي ا نوۆوستي.

«سەپاراتيستىك تەرروريستىك ۇيىم وسى قانقۇيلى ارەكەت ءۇشىن جاۋاپتى. ول ءوز ماقساتىنا جەتۋ ءۇشىن بارىنە بارۋدا. بۇل وقيعا سيريا مەن يراكتاعى وقيعالاردان تىس بولىپ جاتقان جوق. تۇركيا بىرنەشە تەرروريستىك ۇيىمنىڭ كوزدەگەن نىساناسىنا اينالىپ وتىر»، - دەلىنگەن ەردوعاننىڭ جازباشا مالىمدەمەسىندە. ول سونداي-اق تۇركيانىڭ تەرروريزممەن كۇرەسىن تاباندى جالعاستىرا بەرەتىنىن ايتادى.