الماتىدا «الماس قىلىش» فيلمىنىڭ تۇساۋى كەسىلدى

الماتى. قازاقپارات الماتىدا «قازاق ەلى» سەريالىنىڭ «الماس قىلىش» اتالاتىن كينو نۇسقاسى تانىستىرىلدى.

الماتى جۇرتىنىڭ الدىندا فيلمنىڭ تۇساۋىن ق ر مادەنيەت جانە سپورت ءمينيسترى ارىستانبەك مۇحامەدي ۇلى كەسىپ، قالىڭ كورەرمەنگە جول تارتقان تىڭ تۋىندىعا ساتتىلىك تىلەدى، دەپ حابارلايدى قازاقپارات ءتىلشىسى.

«جاھانداعى داعدارىس قازاقستانعا دا اسەرىن تيگىزدى. دەسەك تە رەجيسسەر رۇستەم ابدىراشيەۆ باستاعان ءتۇسىرۋشى توپ باستاعان ءىستى اياعىنا جەتكىزدى. مىنە، بۇگىن ءبارىمىز، ەلىمىزدىڭ ۇلى مەرەكەسىندە سىيعا تارتىپ وتىر. ءبىز ۇكىمەت تاراپىنان قانشا كومەك كورسەتسەك تە، فيلمنىڭ مارەسىنە جەتۋىنە جاردەمىن تيگىزگەن الماتى قالاسى اكىمى باۋىرجان بايبەككە العىس ايتامىن»، - دەدى ارىستانبەك مۇحامەدي ۇلى.

وسىلايشا، العىسىن بىلدىرگەن مينيستر ساحنا تورىنە قالا باسشىسىن شاقىردى. «كەشە عانا استانا قالاسىندا فيلمنىڭ تۇساۋى كەسىلدى. حالىق ىقىلاسپەن قابىل الدى. مۇنداي فيلمدەردىڭ ماقساتى - جاس ۇرپاققا تاريحىن تانىستىرۋ.

بۇگىنگى مەرەكە قۇتتى بولسىن، بىرلىكتىڭ ارقاسىندا شىعىپ جاتقان فيلمگە بارىمىزگە قۇتتى بولسىن. وسى فيلمگە 200 ميلليون تەڭگەدەي اقشا بولگەن «بازيس ا» كومپانياسىنا العىس ايتامىز»، دەدى باۋىرجان بايبەك.

ايتا كەتەيىك، «الماس قىلىش» فيلمى كەرەي مەن جانىبەكتىڭ قازاق حاندىعىن قۇرۋ تاريحىن بەينەلەيتىن فيلم. كوركەم فيلم قازاقستان كينوتەاترلارىندا 5- قاڭتاردان باستاپ، ال تەلەحيكايا وتاندىق ارنالاردا كورسەتىلەدى.

كينوعا 500 گە تارتا ادام، 100 گە جۋىق اكتەر جۇمىلدىرىلعان. كوركەم فيلمنىڭ رەجيسسەرى رۇستەم ءابدىراش. فيلم 15- عاسىردىڭ ورتا تۇسىنداعى قازاق حاندىعىنىڭ قۇرىلۋ تاريحىن باياندايدى.