قازاقستان بارىسىنىڭ ءۇش دۇركىن چەمپيونى بەيبىت ىستىباي قىزدى بولدى
بالۋان ءوزىنىڭ قۋانىشىمەن ينستاگرام جەلىسىندەگى پاراقشاسىندا بولىسكەن. «ارداقتى اعايىن! جاناشىر دوستارىم! تاۋەلسىزدىگىمىز ماڭگىلىك بولعاي! ءسۇيىنشى! شاڭىراعىمدا ۇلى قۋانىش، دۇنيەگە ءسابي كەلدى! نارەستەلى بولدىم، قىزدى بولدىم اعايىن! ءورىسىمدى كەڭەيتكەن اللاعا سانسىز ماداق!! قۋانىشتان جۇرەگىم جارىلارداي بولىپ تۇرمىن. جەڭىستىڭ 40 جىلدىعىندا دۇنيەگە كەلىپ اتىمدى بەيبىت قويىپ ەدى، ۇلى مەرەكە تاۋەلسىزدىكتىڭ 25 ىلدىعىندا قىزىم دۇنيە ەسىگىن اشتى. جاقسى ىرىمعا بالاپ وتىرمىن. ۇلى مەرەكەدە دۇنيەگە كەلگەن بالاپانىمنىڭ باقىتىن باياندى ەتە گور اللا»، - دەپ جازدى بالۋان.
بەيبىتتىڭ قۋانىشىنا ورتاقتاسىپ، قۇتتىقتاپ، ىزگى تىلەكتەرىن ءبىلدىرىپ جاتقاندار كوپ. ايتا كەتەيىك، بەيبىت ىستىباي 2012، 2015 جانە 2016-جىلى «قازاقستان بارىسى» اتاعىن جەڭىپ الدى.
بيىلعى جارىسقا ەلىمىزدىڭ 14 وبلىسى مەن استانا، الماتى قالالارىنان ىرىكتەلگەن 34 بالۋان قاتىستى. بالۋاننىڭ بۇل بەلبەۋدە باعى مەن بابى قاتار جانىپ، جەڭىستى قولدان بەرمەدى. ءۇشىنشى رەت قاتارىنان جەڭىمپاز بولعان چەمپيونعا بۇل جولى 25 ميلليون تەڭگە، التىن تايتۇياق جانە استانادان ءبىر بولمەلى پاتەر بۇيىردى.
اۆتور: سامال قابىشەۆا
