ب ق و قۇراماسى كەكۋشينكاي-كاراتەدەن ەل چەمپيوناتىندا تابىستى ونەر كورسەتتى

ورال. قازاقپارات - ق ر تاۋەلسىزدىگىنىڭ 25 جىلدىعىنا وراي الماتى قالاسىندا كەكۋشينكاي-كاراتەدەن قىزدار مەن ايەلدەر اراسىندا مارەگە جەتكەن ون ءبىرىنشى ەل چەمپيوناتىندا جانە ەرلەردەن ءابسوليۋتتى سالماق دارەجەسىندە كۋبوك سايىسىندا ب ق و قۇراماسى تابىستى ونەر كورسەتتى، دەپ حابارلايدى قازاقپارات ءتىلشىسى.

ب ق و دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، اتالمىش جارىسقا استانا، الماتى قالالارى مەن بارلىق وبلىستاردىڭ قۇراما كوماندالارى قاتىستى. ب ق و نامىسىن 15 سپورتشى قورعادى.

چەمپيونات قورىتىندىسىندا 14-15 جاستاعىلار اراسىندا نۇرگۇل ساپاروۆا 50 كەلى سالماق دارەجەسىندە التىننان القا تاقسا، ءالينا سەرىك 10-11 جاستاعىلاردان 40 كەلى استام سالماقتا قولا جۇلدەنى يەلەندى. سونداي-اق ەرلەر اراسىندا ابسوليۋتتى سالماق دارەجەسىندە ق ر كۋبوگى سايىسىندا سەلەنگە يسحان ءۇشىنشى ورىنعا كوتەرىلدى. ولارعا مەدال، كۋبوك، ديپلومدار تابىس ەتىلدى.

اۆتور: ەلجان ەرالى