نۇربەرگەن جۇماعازيەۆ شورت-ترەكتەن الەم كۋبوگى كەزەڭىنىڭ جەڭىمپازى اتاندى

ورال. قازاقپارات - باتىس قازاقستاندىق نۇربەرگەن جۇماعازيەۆ وڭتۇستىك كورەيانىڭ كاننىن قالاسىندا شورت-ترەكتەن الەم كۋبوگىنىڭ ءتورتىنشى كەزەڭىندە جەڭىمپاز اتاندى، دەپ حابارلايدى قازاقپارات ءتىلشىسى.

Sports.kz سايتىنان الىنعان مالىمەتكە قاراعاندا، نۇربەرگەن 1 مىڭ مەتر قاشىقتىقتا ءبىرىنشى كەلسە، كانادالىق پاسكال ديون مەن پاتريك داففي ەكىنشى جانە ءۇشىنشى ورىندى ءبولىستى. قازاقستاندىق شورتترەكشىگە فينالدا ءۇش بىردەي وكىلى ونەر كورسەتكەن ايدىن يەلەرى دە ىلەسە العان جوق.

ايتا كەتەيىك، وسىمەن بيىل قازاقستاندىق شورت-ترەكشىلەر ەكىنشى رەت الەم كۋبوگى كەزەڭىنىڭ جەڭىمپازى اتانىپ وتىر. مۇنىڭ الدىندا تاعى ءبىر باتىس قازاقستاندىق ابزال اجىعاليەۆ قاراشا ايىندا سولت-لەيك-سيتي (ا ق ش) قالاسىندا 500 مەتر قاشىقتىقتا الدىنا جان سالماعان بولاتىن.

وسىعان دەيىن قازاقستاندىق شورتترەكشىلەر مۇنداي تابىسقا قول جەتكىزبەگەن ەدى. ابزال مەن نۇربەرگەن كەزىندە ورالداعى جابىق مۇز ايدىنى سارايىندا قازاقستاننىڭ ەڭبەك سىڭىرگەن جاتتىقتىرۋشىسى ءمادىعالي قارسىبەكوۆتىڭ باسشىلىعىمەن العاشقى قادامدارىن باستاعان بولاتىن.

ولار سوچي وليمپياداسىندا قازاقستان قۇراماسى ساپىندا 5 مىڭ مەتر قاشىقتىقتا ەستافەتالىق سىندا فينالعا دەيىن جەتىپ، بەسىنشى ورىندى يەلەنگەن ەدى.

اۆتور: ەلجان ەرالى