مەملەكەت باسشىسى جانىندا جۇرگەن ۇزەڭگىلەستەرىنە العىس ايتتى
«بارشاڭىزدى كورگەنىمە قاتتى قۋانىپ وتىرمىن. قازاقتا «ۇزەڭگى جولداس» دەگەن كەرەمەت ءسوز بار، ۇزەڭگىلەس دەگەن ءسوزدىڭ اتقا ءمىنىپ جۇرگەن قازاقتىڭ بالاسىنا قانداي ماعىنا بەرەتىنىن بىلەمىز. سوندىقتان، تاۋەلسىزدىكتىڭ 25 جىلى بويىندا كىم ءجۇردى، سولاردى ىرىكتەپ، سايدىڭ تاسىنداي، جيناپ الۋ وڭايعا تۇسكەن جوق. دەگەنمەن، 25 جىلدىڭ ىشىندە، ءومىردىڭ ءار سالاسىندا، جانىمدا ءجۇرىپ، ءوز مىندەتتەرىڭىزدى جاقسى ورىندادىڭىزدار»، - دەگەن مەملەكەت باسشىسى سەرىكتەستەرى بولماعاندا، قۋاتتى قازاقستاندى قۇرۋ قولىنان كەلمەيتىنىن ايتتى.
«ءومىردىڭ ءار سالاسىندا، مادەنيەت، دەنساۋلىق ساقتاۋ، الەۋمەتتىك جاعىنان اتسالىسىپ كەلە جاتقان ازاماتسىزدار. تاۋەلسىزدىكتىڭ العاشقى جىلىن ەسكە تۇسىرسەك، بىرىنشىدەن، وتە ۇلكەن قۋانىش. ادامنىڭ كوكىرەگىن كەرنەگەن قۋانىش. سەبەبى، بابالارىمىزدىڭ ارمانى ورىندالعان قۋانىش ەدى. ەكىنشى جاعىنان، قيىندىقتان قالاي وتەمىز دەگەن جاعدايدا تۇردىق»، - دەدى ەلباسى.
اۆتور: كەنجەكەي توقتامۇرات قىزى
