اتاقتى اكتەر اياعىن سىندىرىپ الدى

استانا. قازاقپارات - گولليۆۋد اكتەرى، كاليفورنيا شتاتىنىڭ بۇرىنعى گۋبەرناتورى ارنولد شۆارتسەنەگگەر وڭ اياعىن سىندىرىپ الدى.

ءارتىس ABC News ەفيرىنە شىعاتىن Live with Kelly تەلەحابارىنا ارنايى مەديتسينالىق باتەڭكە كيىپ كەلدى.

«انشەيىن پەديكيۋر كەزىندەگى ازداعان ساتسىزدىك»، - دەپ ازىلدەي جاۋاپ بەردى ول جۇرگىزۋشىنىڭ وسى جاعدايعا بايلانىستى قويعان ساۋالىنا. شۆارتسەنەگگەر ارتىنشا، شامادان تىس تۇسكەن جۇكتەمەنىڭ سالدارىنان اياق سۇيەگىنە سىزات تۇسكەندىگىن جەتكىزدى.

«مۇمكىن بۇل شاڭعىمەن ءجيى سەرۋەندەۋىنەن، مۇمكىن كوپ وتىرىپ نەمەسە كوپ جۇگىرگەندىگىنەن بولار... ءبىراق بۇل كىمگە ۋايىم دەيسىڭ؟» - دەپ اتاپ ءوتتى ول.

 دەگەنمەن، 69 جاستاعى اكتەر ءوزىنىڭ كوپ ۋاقىتىن جوعارىدا ايتقان سپورتتىق شارالارعا جۇمسايتىندىعىن ەسكەرتە كەتتى.

 شۆارتسەنەگگەر، دارىگەرلەردىڭ وعان بىرنەشە اپتا بويى مەديتسينالىق باتەڭكەنى كيۋى تيىستىگىن ۇسىنعانىن، ءبىراق ءوزى ونى «تەزدەتىپ شاڭعىعا اۋىستىرۋعا جينالىپ» جۇرگەنىن جەتكىزدى. جۇرگىزۋشى دە ءسوز اراسىندا بۇل اياق كيىمنىڭ «تەرميناتوردىكى» ءتارىزدى كورىنەتىندىگىن ايتا كەتتى.

 ەسكە سالا كەتسەك، قازان ايىندا شۆارتسەنەگگەر مەن دجەكي چان ولەگ ستەپچەنكونىڭ «ۆيي - قىتايعا ساپار: تەمىر ماسكا قۇپياسى» («ۆيي-2» ) فيلمدەرىندەگى رولدەر سومدايتىندىعى بەلگىلى بولعان ەدى.

 كاليفورنيانىڭ بۇرىنعى گۋبەرناتورىنىڭ قاتىسۋىمەن شىققان فيلمدەردىڭ جۇرتشىلىققا كەڭىنەن تانىمالدارى - «تەرميناتور»، «كومماندو»، «جىرتقىش»، « قىزىل اپتاپ»، «ءبارىن ەسكە ءتۇسىرۋ»، «بالاباقشا پوليتسەيى» جانە «اقىرزامان».

اۆتور: ەرلان قوجاكەلديەۆ