تاسماعامبەتوۆ پرەزيدەنتتىڭ شەتەلدەگى وتە اۋىر جۇمىس كەستەسى جايىندا ايتىپ بەردى
دەپ حابارلايدى قازاقپارات.
«مەن ول كەزدە پرەزيدەنتتىڭ كومەكشى بولىپ جۇمىس ىستەيتىنمىن. ءالى ەسىمدە، ءبىز الماتىدان كۇندىزگى 12-دە ۇشىپ شىعىپ، ۆاشينتونعا جەرگىلىكتى ۋاقىتپەن كۇندىزگى 12-دە جەتتىك. ياعني، ءبىز 12 ساعات ۇشتىق، ال ۋاقىت ايىرماشىلىعى دا 12 ساعات بولاتىن. ۇشاق تراپىنان بىردەن نۇرسۇلتان ءابىش ۇلىنىڭ ساپارى، كەزدەسۋلەرى كەلىسسوزدەرى باستالدى. ءبىز قوناق ۇيگە شامامەن 6-دا جەتتىك. بىزگە كيىم اۋىستىرۋعا جارتى ساعات ۋاقىت بەرىلدى، ساعات جەتىدە رەسمي قابىلداۋ ەدى. نۇرسۇلتان ءابىش ۇلى ءوز نومەرىنە، مەن ءوزىمنىڭ نومىرىمە كىرىپ، جانىما راتسيانى قويدىم جانە كۇزەتشىدەن پرەزيدەنت شىققان كەزدە ماعان بىردەن ەسكەرتۋدى ءوتىندىم. ءبىز 12 ساعات ۇشىپ كەلىپ، كۇنى بويى جۇمىس ىستەگەننەن كەيىن شارشاپ، كوزىم ءىلىنىپ كەتىپتى. ويانعاننان كەيىن دە 5 مينۋت قانا كوز شىرىمىن العانداي بولدىم. راتسيا ءۇنسىز. نومىرىمنەن جۇگىرىپ شىعىپ، پرەزيدەنت نومىرىنە جەتسەم كۇزەتشى تۇر. مەن ودان «قابىلداۋعا قاشان شىعاتىن بولدىق؟» دەپ سۇرادىم. ال ول ماعان «قايداعى قابىلداۋ؟ قابىلداۋ اياقتالدى، قازىر تاڭعى ساعات 7» دەيدى. سويتسەم، مەن ءتۇنى بويى قاتتى ۇيىقتاپ قالىپپىن. مەن مۇنىمەن كەستەنىڭ قانداي قاربالاس بولعاندىعىن جانە بۇل كەستەگە بارلىعى بىردەي شىداي بەرمەيتىندىگىن ايتقىم كەلدى»، - دەدى تاسماعامبەتوۆ.
ءوز كەزەگىندە ەلباسى: «يمانعالي، بۇل جايت مەنىڭ ەسىمدە جوق»، - دەدى.
اۆتور: مارلان جيەمباي
