تاۋەلسىزدىك - ازاتتىققا ۇمتىلعان حالقىمىزدىڭ قايسارلىعى مەن نامىسىنىڭ جەمىسى - اماندىق باتالوۆ
سالتاناتتى جيىنعا الماتى وبلىسىنىڭ اكىمى اماندىق باتالوۆ جانە قالا اكىمى باعدات قاراسايەۆ قاتىستى. جەتىسۋلىقتاردى ەلىمىزدىڭ ەڭ قاسيەتتى مەرەكەسىمەن الماتى وبلىسىنىڭ اكىمى اماندىق باتالوۆ قۇتتىقتادى.
«ءبىز بۇگىندە الەم تانيتىن، تورتكىل دۇنيەمەن تەرەزەسى تەڭ تاۋەلسىز مەملەكەتپىز. تاۋەلسىزدىك - ازاتتىققا ۇمتىلعان حالقىمىزدىڭ قايسارلىعى مەن نامىسىنىڭ جەمىسى. ءبىز تاتۋلىق پەن بىرلىكتىڭ ناتيجەسىندە وركەنيەت كوشىنە بىرتە- بىرتە قادام جاساپ كەلەمىز. تاۋەلسىزدىگىمىز ءبىزدىڭ ەڭ باستى قۇندىلىعىمىز. ونى قورعاۋ ءبىزدىڭ ەڭ قاسيەتتى بورىشىمىز!» دەپ اتاپ ءوتتى ءوڭىر باسشىسى ءوز قۇتتىقتاۋىندا.
ايتا كەتۋ كەرەك، مەرەكەلىك شارانى شاھار جۇرتشىلىعى ءسان- سالتاناتپەن اتاپ وتۋدە. «جاستار» ساياباعىنا كىرە بەرىستە سپورتتىق ۇيىرمەلەر ءتۇرلى جارىستار وتكىزسە، ولارعا قارسى الاڭقايدا قازاقستان رەسپۋبليكاسىنىڭ تاۋەلسىزدىگىنە قاتىستى سۇراق- جاۋاپ سايىسى ۇيىمداستىرىلدى. ال، ساحناعا دەيىنگى ارالىققا ەل ەگەمەندىگىنە ارنالعان قىلقالام شەبەرلەرىنىڭ كوركەم سۋرەت كورمەسى قويىلعان. نەگىزگى شارا جاستار پاركىنىڭ ورتالىق الاڭىندا ءوتتى. مۇندا قالانىڭ ونەر ۇجىمدارى كورەرمەندەرگە تاۋەلسىزدىگىمىز بەن تاريحىمىزدى بايلانىستىرىپ، ساحنالىق قويىلىم ۇسىندى. 
سالتاناتتى جيىن سوڭى پاتريوتتىق اندەر شىرقالعان مەرەكەلىك كونتسەرتكە ۇلاستى. قالا جۇرتشىلىعىنا «تالدىقورعان اۋەندەرى» انسامبىلى، ميراس پەن قۇرالاي جانە «لاشىن» توبى سەكىلدى ەسترادا جۇلدىزدارى ءوز ونەرلەرىن ۇسىندى.
اۆتور: سامال قابىشەۆا
