تاۋەلسىزدىك كۇنىندە «قازاقپارات» ح ا ا ۇجىمى كوپبالالى وتباسىلارعا سىي جاسادى - فوتو

استانا. قازاقپارات - «قازاقپارات» حالىقارالىق اقپارات اگەنتتىگىنىڭ ۇجىمى تاۋەلسىزدىك مەرەكەسىنە وراي استانا قالاسىندا تۇراتىن بىرنەشە كوپ بالالى وتباسىعا سىيلىق جاسادى، دەپ حابارلايدى اگەنتتىك ءتىلشىسى.

ەستەرىڭىزدە بولسا، جۋىردا استانادا «مەيىرىمدى قالا» اكسياسى باستالعان بولاتىن. اكسيانى قولداعان اگەنتتىك قالادا كومەككە مۇقتاج بىرنەشە وتباسىنا تاۋەلسىزدىك كۇنى سىي جاسادى.



«قازاقپارات» كومەكتەسكەن وتباسىلاردىڭ ءبىرى - انالارى قايتىس بولعان، ال اكەسى ناۋقاس كۇيىندە 4 بالانى جالعىز تاربيەلەپ وتىرعان جانۇيا. انالارى كوز جۇمعان سوڭ شاحدات ءتورت بالاسىن دالاعا قالدىرماي، ءوزى اسىراعان. ءبىراق، قاراشا ايىنىڭ سوڭىندا وپەراتسيا جاساتقان شاحدات قازىر ۋاقىتشا جۇمىسسىز وتىر ەكەن. بالالارىنىڭ جاسى 2, 4, 6, 8 دە. ۇجىم ازىق- تۇلىك پەن وزگە دە كەرەك زاتتاردى اپارعان ەكىنشى وتباسى - جالعىزباستى كەنجەگۇل ەسىمدى ايەل. كەنجەگۇلدىڭ 6, 8, 10, 12, 16 جاستاعى بەس بالاسى بار. كەنجەگۇلدىڭ جۇبايى 6 -جىل بۇرىن قايتىس بولعان ەكەن.



تاۋەلسىزدىك كۇنىندە قۋانىشقا بولەنگەن ءۇشىنشى وتباسى - جاننا مەن ونىڭ التى بالاسى. جاننانىڭ ەڭ كىشى بالاسى نەبارى 3-ايلىق، ال، ەڭ ۇلكەنىنىڭ جاسى 13-تە عانا.



«قازاقپارات» ۇجىمى قىزمەتكەرلەردەن جينالعان قاراجاتقا مولىنان ازىق- تۇلىك، بۇلدىرشىندەرگە ويىنشىق، تازالىق زاتتارى مەن سابيلەردىڭ جورگەكتەرىن ساتىپ الىپ، تارتۋ ەتتى.

اۆتور: كەنجەكەي توقتامۇرات قىزى