بەلگىلى عالىم سۇلتان جانبولاتوۆ قازاق ەلىنە اق باتاسىن ارنادى
« ءوزىن قۇراعان تايپالار وداعى - عۇن قاعاندىعى، ءۇيسىن، قاڭلى، الان حاندىقتارى تاريحى 3000 جىلدىڭ ارىسىنان باستالسا دا، ارادا سان تالىپ، سان ەس جيعان، ءوز اتىنداعى مەملەكەتتىگىنە 550 جىل تولىپ وتىرسا دا، بەرتىن كەلە دەربەستىگىنەن ايرىلعان ۇلى قازاق ەلىنىڭ تاۋەلسىزدىگىنىڭ قولىنا قايتا ورالىپ، باسىنا باقىتتىڭ تاعى قونعانىنا شيرەك عاسىر تولىپ وتىر. بۇل ۇلى مەرەكە قۇتتى بولسىن!! قازاق ەلىنىڭ كوك بايراعى بيىكتەردەن جەلبىرەپ، ەل مارتەبەسى ارتا بەرسىن!» - دەيدى عالىم.
سونىمە بىرگە سەكسەننىڭ سەڭگىرىنە كەلگەن جازۋشى قازاقستان تاۋەلسىزدىگىنە اق باتاسىن بەردى.
«قازاق دەگەن باسىم بار، سەكسەنگە كەلگەن جاسىم بار، سوعان وراي اۋزىما ءتۇسىپ تۇر، اق باتالىق اسىلدار:
ءبيسميللاھير راحمانير راحيم!
ۇلى قازاق ماڭگىلىك ەلگە باتا،
ۇلى دالا قاسيەتتى جەرگە باتا،
ادىلەتتىڭ اق جولىنان تايماعان،
ەلى ءۇشىن ەڭبەك ەتكەن ەرگە باتا.
مىنا ءار تۇكپىردەن تويعا كەلگەن،
ەلىنە شىن ىقىلاس بەرگەن،
وكىلدەردىڭ قۇتتى قىلسىن قادامىن!
توي جەمىستى بولىپ،
كەڭەسۋ اقىلعا تولىپ،
تاباتىن بولايىق ۇلتىمىزدىڭ قالاۋىن!
ساقتاعىش ءوز سالتىن،
بىلەتىن ءسوز نارقىن،
تەگى اسىل ءاز حالقىم!
اللا جولىڭدى وڭداپ،
ارۋاقتار قولداپ،
بارىنەن دە اۋەلى،
بايتەرەك بوپ ماۋەلى،
ۇرپاعىڭمەن ماڭگىلىككە جاسار بول!
پىكىرسايىس ءماندى ويعا،
ۇساق شارا زور تويعا،
ۇلاسىمىن تاۋىپ،
باعىڭ ءتىپتى جانىپ،
زەيىن قايتپاي اعادان،
باس شىعىپ ءبىر جاعادان،
سىزات تۇسپەي ساعادان،
بيىكتەردەن اسار بول!
لايىم ۇنەمى العا باسا بەر،
شارىقتاپ، وزگە جۇرتتان اسا بەر،
ورىندالسىن ەندىگى ارمان، تالابىڭ!
اللا تاعالا ءدايىم قۋاتتاي،
بايلىعىن بەرسىن سۋالتپاي،
دەشتى ساقيا اتالعان ۇلى دالانىڭ!
تۋ ۇستاعان ەلباسىڭا،
وعان ەرگەن كارى- جاسىڭا،
اقىلىن ۇستەي بەرسىن ەڭ عۇلاما دانانىڭ!
سىرتقا تاستاي بەرىك بول،
ىشتە ءوزارا سەرىك بول،
مىزعىماسىن تاۋەلسىزدىك تاعانىڭ!
عىلىمدى جابال يگەرىپ،
زاماناۋي كۇيگە ەنىپ،
ۇشا دامى، قۋىرىپ ءداۋىر تانابىن!
حالقىڭ بايىپ ءىشتى بولسىن!
ارمياڭ جەڭىمپاز كۇشتى بولسىن،
ماڭگى بەيبىت تۇرسىن، ءتورت توڭىرەك تاراپىڭ!
ميلليونداپ ۇرپاق- باس بەرسىن،
بارىنە جۇزدەن جاس بەرسىن!»
اۆتور: ريزابەك نۇسىپبەك ۇلى
