ءانۇرانىمىزدى بيىكتەن شىرقاتىپ جۇرەمىز دەپ ءسوز بەرەمىن - دانيار ەلەۋسىنوۆ

استانا. قازاقپارات - وليمپيادا چەمپيونى دانيار ەلەۋسىنوۆ بارشا قازاقستاندىقتاردى تاۋەلسىزدىك مەيرامىمەن قۇتتىقتاپ، ەلىمىزدىڭ ءانۇرانىن ءارقاشان شىرقاتىپ جۇرۋگە ۋادە بەردى، دەپ حابارلايدى قازاقپارات ءتىلشىسى.

«ەلىمىزدىڭ مەرەيلى مەرەكەسى - تاۋەلسىزدىكتىڭ 25 جىلدىعى قۇتتى بولسىن! بارشا قازاقستاندىقتاردى شىن جۇرەگىممەن قۇتتىقتايمىن! تاۋەلسىزدىگىمىز باياندى بولسىن، ەلىمىز امان، جۇرتىمىز تىنىش بولسىن! ءبىز، جاستار تاۋەلسىز ەلىمىزگە قىزمەت ەتەمىز. سپورتشىلاردىڭ اتىنان الداعى ۋاقىتتا ەلىمىزدىڭ ابىرويىن بيىك ۇستاپ، تۋىمىزدى جوعارى كوتەرىپ، ءارقاشان ءانۇرانىمىزدى شىرقاتىپ جۇرە بەرەمىز دەپ ءسوز بەرەمىن. ۇلكەن جارىستاردا تەك جەڭىسپەن عانا ورالاتىن بولامىز. سوندىقتان جەڭىستى كۇندەردە جولىعايىق!»، - دەيدى وليمپيادا چەمپيونى.

ايتا كەتەيىك، كۇنى كەشە تاۋەلسىزدىكتىڭ 25 جىلدىعىنا ارنالعان سالتاناتتى جيىندا د. ەلەۋسىنوۆ جاستاردىڭ ۇرانىن رەسمي تۇردە بەكىتۋدى ۇسىندى. «الەمدەگى كوپتەگەن مەملەكەتتەردىڭ ۇراندارى بار. جاستاردى جىگەرلەندىرىپ، ازاماتتاردى بىرىكتىرەتىن ءبىراق اۋىز ءسوز. ءبىزدىڭ بابالارىمىز دا ۇران شاقىرىلعاندا ءبىر تۋدىڭ استىنان تابىلعان. وسىعان بايلانىستى سپورتشىلاردان وزىڭىزگە ۇسىنىس بار. «قازاقستان، تەك قانا العا!» دەگەن ءسوزىڭىزدى ەلىمىزدىڭ رەسمي ۇرانىنا اينالدىرساق. بۇل بارشا پاتريوتتاردىڭ ماڭگىلىك ۇرانى بولار ەدى»، - دەدى ول. پرەزيدەنت ن. نازاربايەۆ چەمپيوننىڭ بۇل ۇسىنىسىن قولدادى. «مۇنى قولدايمىن. ۇرانىمىز - «العا، قازاقستان!» بولسىن»، - دەدى مەملەكەت باسشىسى.

اۆتور: ارمان اسقاروۆ