قىتايدىڭ ۇلتتىق كىتاپحاناسىندا قازاقستاندىق ادەبيەت بۇرىشى اشىلدى
شارانى قازاقستان مادەنيەت جانە سپورت مينيسترلىگى جانە قىتاي مادەنيەت مينيسترلىگىنىڭ جاردەمىمەن ق ح ر- داعى ق ر ەلشىلىگى ۇيىمداستىردى. وعان ق ح ر- داعى ق ر توتەنشە جانە وكىلەتتى ەلشىسى شاحرات نۇرىشيەۆ، قازاقستان ۇلتتىق اكادەميالىق كىتاپحانا باسشىسى ءۇمىتحان مۇعالبايەۆا، قىتاي ۇلتتىق كىتاپحانا ديرەكتورى حان يۋنتسزين، قازاقستاندىق ديپلوماتتار، قىتاي ورتالىق تەلەارناسىنىڭ تىلشىلەرى، بەلگىلى جازۋشى اكبار ءماجيت، ق ح ر- داعى باسقا دا قازاق زيالىلارى قاتىستى.
قازاقستان ۇلتتىق اكادەميالىق كىتاپحاناسى قىتاي ۇلتتىق كىتاپحانا قورىنا قازاق، ورىس، اعىلشىن، قىتاي تىلدەرىندە كوركەم، عىلىمي-پۋبليتسيستيكالىق، باسقا دا جانرلار قامتىلعان 100 دەن استام كىتاپ، ونىڭ ىشىندە قازاقستان پرەزيدەنتى نۇرسۇلتان نازاربايەۆتىڭ، ق ر كورنەكتى ساياسات قايراتكەرلەرىنىڭ تۋىندىلارىن تاپسىردى. سونداي-اق شارا قاتىسۋشىلارىنىڭ نازارىنا «تۇران» ەتنو-فولكلورلىق ءانسامبلىنىڭ كونسەرتى ۇسىنىلدى.
«مادەني بايلانىستار قازاقستان مەن قىتاي حالىقتارى اراسىنداعى دوستاستىق قاتىناستاردى نىعايتۋدا ەرەكشە رولگە يە. ەكى ەل قوعامداستىعىنىڭ ۇزدىك ءوزارا تۇسىنىستىگى ءۇشىن ادەبي تۋىندىلارمەن الماسۋدىڭ ماڭىزى زور. بۇگىنگى شارا - قىتاي ۇلتتىق كىتاپحاناسىندا قازاق ادەبيەتىنىڭ بۇرىشىن اشۋ - ەكىجاقتى قاتىناستىڭ ەرەكشە دەڭگەيىنىڭ كۋاسى بولىپ تابىلادى»، - دەدى راسىمدە ش. نۇرىشيەۆ.
قىتاي ۇلتتىق كىتاپحاناسىنىڭ ديرەكتورى حان يۋنتسزين قازاقستاندىق تاراپقا سىيلاعان كىتاپتارى ءۇشىن العىس ءبىلدىردى. «ق ۇ ك قازاق ادەبيەتى بۇرىشىن اشۋ قىتاي مەن قازاقستان اراسىنداعى ديپلوماتيالىق قاتىناس ورناتۋدىڭ 25 جىلدىعى جانە ق ر تاۋەلسىزدىگىنىڭ 25 جىلدىعى قارساڭىندا وتۋدە»، - دەدى ول.
قىتاي حالىق رەسپۋبليكاسى بولىپ جاريالانعان ساتتە كىتاپحانا قورىندا ءبىر جارىم ميلليونعا جەتەر-جەتپەس قۇجات بولعان. 1998-جىلعى جەلتوقساندا ق ح ر مەملەكەتتىك كەڭەسى كىتاپحانانىڭ اتىن «چجۋنگو گوتسزيا تۋشۋگۋان» (قىتاي ۇلتتىق كىتاپحاناسى) دەپ وزگەرتتى. كىتاپحانا الەمدەگى قىتاي كىتاپتارىنىڭ ەڭ كوپ كوللەكتسياسىن قامتيدى.
