يمانعالي تاسماعامبەتوۆ: حالىق ءۇشىن تاۋەلسىز ەل بولۋ - مىڭ باقىت
«ءيا، ادام ءۇشىن الاڭسىز ءومىر ءبىر باقىت بولسا، حالىق ءۇشىن تاۋەلسىز بولۋ - مىڭ باقىت! ال «باقىت» دەگەنىمىز ورىندالعان اق ارمان. اشىعىن ايتۋ كەرەك. بۇل جولعى باق - ءبىزدىڭ ماڭدايىمىزعا بۇرىن-سوڭدى قونباعان باق. وعان وسىناۋ سايىن دالامىزدىڭ كوزى، ءاز اتالارىمىزدىڭ ءسوزى، اقباس تاريحتىڭ ءوزى كۋا. ءوز الدىنا ەل بولامىن دەگەن حالقىمىزدىڭ سوناۋ تۇركى قاعاناتىنان جالعاسقان 15 عاسىرلىق تامىرى، 1500 جىلدىق عۇمىرى كۋا»، - دەپ اتاپ ءوتتى ي. تاسماعامبەتوۆ.
ول VI عاسىرداعى كوك تۇركىلەر زامانىنان بەرى ۇلى دالادا ءىزى قالعان قاعاناتتار مەن حاندىقتاردى 128 قاعان مەن حان بيلەگەنىن ايتا كەلە، ولاردىڭ ەشقايسىسى ەلىنىڭ شەكاراسىن شەگەلەي الماعانىن ايتتى.
«مۇنداي ءداۋىرلى وي مەن ءدۇبىرلى ىستەردىڭ تۇبىندە ءبىر عانا بولەك دۇنيە - ءاربىر قازاق كۇنى-ءتۇنى قاپەرىنەن شىعارماي، ىشتەي تاۋبە ەتەتىن، ەلباسىمىز ءار سوزىنەن تاستاماي، ايتىپ جۇرەتىن ۇلى قۇندىلىق جاتىر. ول - ەلدىڭ اماندىعى. بىرلىگى مەن بۇگىنگى بەيبىت تىرلىگى. بەرەكەسى مەن ىرىسى»، - دەپ ءسوزىن جالعادى ۆيتسە-پرەمەر.
وسى ورايدا، يمانعالي تاسماعامبەتوۆ كەشەگى كەڭەستىك جۇيە قيراپ، باۋىرلاس ەلدەرىمىزدىڭ باسىنا تۇسكەن قيىن زامانداردان مىسال كەلتىردى.
«فەرعانا مەن وش ۇلتارالىق قاقتىعىستارىنىڭ ناتيجەسى - 1500 ءولىم، 10 مىڭ مۇگەدەك، 35 مىڭ بوسقىن؛ ابحاز- گرۋزين سوعىسى - 9 مىڭ ءولىم، 10 مىڭ مۇگەدەك، 300 مىڭ بوسقىن؛ قاراباق سوعىسى - 30 مىڭ ءولىم، 150 مىڭ مۇگەدەك، 1 ميلليون بوسقىن؛ تاجىكستانداعى ازاماتتىق سوعىس - 60 مىڭ ءولىم، 280 مىڭ مۇگەدەك، 1,5 ميلليون بوسقىن. بۇل ءجاي عانا ساندار ەمەس. تاتۋلىقتىڭ تامىرىن، ىنتىماقتىڭ ىرىسىن، بەيبىتشىلىكتىڭ قادىرىن بىلەتىن تاعدىرلار»، - دەدى ول.
اۆتور: رۋسلان عابباسوۆ
