نازاربايەۆ: انا ءتىلىمىزدى تۇلەتىپ، اتا ءدىنىمىزدى ورالتقان ايشىقتى ەلمىز
«قىمباتتى وتانداستار! بارشاڭىزدى ەلىمىزدىڭ ەڭ ۇلى مەرەكەمىز ءارى ەلىمىزدىڭ اسقار اسۋى تاۋەلسىزدىكتىڭ 25 جىلدىعىمەن شىن جۇرەگىمنەن قۇتتىقتاۋعا رۇقسات ەتىڭىزدەر. ءبىز 1991 -جىلى 16- جەلتوقساندا تاۋەلسىزدىگىمىزدى جەر جۇزىنە جاريالاپ، كۇللى الەمگە پاش ەتتىك. الدىمەن كونە تۇركىنىڭ ءبورىلى بايراعىنىڭ مۇراگەرى كوك تۋىمىزدى ب ۇ ۇ تورىندە جەلبىرەتتىك. ءانۇرانىمىزدى الەم كوگىندە الەۋەتتىك. ەلتاڭبامىزدى ماڭگىلىك مورگە اينالدىردىق. ءتول تەڭگەمىزدى ەنگىزىپ، اتا زاڭىمىزدى قابىلدادىق. قارۋلى كۇشتەرىمىزدى قۇرىپ، شەكارامىزدى شەگەندەدىك. مەملەكەتتىك ءتىلىمىزدى الەمنىڭ ەڭ بيىك مىنبەسىنەن سويلەتكىزدىك. ءبىز 1500 جىل بۇرىن كۇلتەگىن تۇسىندا جازىلعان «ماڭگىلىك ەل» ۇعىمىن جالپى ۇلتتىق يدەياعا اينالدىرىپ، ەلدىگىمىزدىڭ 15 عاسىرلىق تامىرىنا ءنار بەردىك. ماڭگى جاسىل ەتىپ گۇلدەندىردىك»، - دەدى ەلباسى.
قازاقستان پرەزيدەنتى تەرەڭ تاريحىمىز بەن مىڭجىلدىق بولاشاعىمىزدى ساباقتاستىرىپ، ماڭگىلىك ەل بولۋدىڭ دارا جولىنا تۇسكەنىمىزدى دە باسا ايتتى.
«بۇگىنگى انا ءتىلىمىزدى تۇلەتىپ، اتا ءدىنىمىزدى ورالتقان ايشىقتى ەلمىز. تاعىلىمدى تاريحىن تۇگەندەگەن جورالى جۇرتپىز. بارشا قازاقتىڭ باسىن بىرىكتىرگەن ءباتۋالى ۇلتپىز. ءبىز دالامىز بەن قالامىزدى بىرگە كوركەيتكەن قۋاتتى حالىقپىز. ارقا توسىنە تاۋەلسىزدىكتىڭ سيمۆولى - ەلوردامىزدى ورناتقان جاسامپاز جۇرتپىز. دوستىقتىڭ دارا داستۇرلەرىن دامىتقان ءبىرتۇتاس ۇلتپىز. كورشىمەن تاتۋ، شالعايمەن سىيلاس ءومىر ءسۇرۋدىڭ ونەگەسىن كورسەتكەن، ساليقالى سىرتقى ساياسات جۇرگىزگەن ۇلاعاتتى ۇلىسپىز. ءبىز الەمدىك قارۋسىزدانۋ ءىسىنىڭ تىزگىنىن ۇستاعان كوشباسشى حالىقپىز. الىس بولاشاققا كوز تىككەن مەرەيلى مەملەكەتپىز»، - دەپ اتاپ ءوتتى نازاربايەۆ.
اۆتور: مارلان جيەمباي
