پرەزيدەنت دارىگەردىڭ حاتىن وقىپ بەردى
«مەن - دارىگەرمىن. 25 جىلدان بەرى مەديتسينا سالاسىندا قىزمەت ىستەيمىن. 90-جىلدارداعى قيىن ساتتەر ءالى كۇنگە دەيىن كوز الدىمدا. مۇقتاج جاندارعا دەر ۋاقىتىندا كومەك كورسەتۋ ءبىزدىڭ ارمانىمىز ەدى. ءبىزدىڭ سول ارمانىمىزدى ءسىز ورىندادىڭىز. 2011 -جىلدان بەرى سانيتارلىق اۆياتسيامەن 6 مىڭ 700 رەت ساپارعا شىعىپ، 8,5 مىڭ ادامعا جەدەل كومەك كورسەتتىك. سونىڭ ارقاسىندا ومىرگە قايتا ورالعان جانداردىڭ سىزگە ايتقان العىس- باتالارىن تەبىرەنبەي تىڭداۋ مۇمكىن ەمەس» ، - دەپ جازدى دارىگەر.
وسى ورايدا پرەزيدەنت وتاندىق مەديتسينانىڭ بۇرىنعى جانە قازىرگى دەڭگەيىنىڭ ايىرماشىلىعى جەر مەن كوكتەي ەكەنىن جەتكىزدى. پرەزيدەنتتىڭ ايتۋىنشا، بۇگىندە جىلجىمالى ەمدەۋ كەشەندەرى شالعاي جەردەگى ازاماتتارعا كومەك كورسەتىپ ءجۇر. سوڭعى بەس جىلدىڭ ىشىندە 3 ميلليون ادامعا مەديتسينالىق كومەك جاسالدى. «سولاردى تىڭداپ وتىرساڭ، قازاقستاننىڭ ەڭ تۇكپىردەگى جەرلەرگە بارىپ، دارىگەردىڭ الدىن كورمەگەن ادامداردى دا كەزدەستىرگەن. وعان ارناۋلى پوەزداردى قوسىڭىز. وسىنىڭ ارقاسىندا ەڭ الىس اۋىلداردىڭ تۇرعىندارى استانالىق دەڭگەيدە ساپالى كومەك الدى. ەلىمىزدە سابيلەردىڭ دۇنيەگە كەلۋى 55 پايىزعا ءوستى. ازاماتتاردىڭ ورتاشا ءومىر ءسۇرۋ ۇزاقتىعى 72 جاسقا جەتتى. مەنىڭشە، ەڭ نەگىزگى جەتىستىگىمىز وسى» ، - دەپ اتاپ كورسەتتى مەملەكەت باسشىسى.
اۆتور: ارمان اسقاروۆ
