اعىلشىن جازۋشى- رومانشى، سىقاقشى ۋ. تەككەرەيدىڭ عيبراتتى سوزدەرى
* ارەكەتىڭ ادەت، ادەتىڭ مىنەز- قۇلىق، ال مىنەز- قۇلقىڭ تاعدىرىڭ بولادى.
* جاراتۋشى يەمىز ادامزاتتى ىنتىماقپەن ۇيىتتى. مەنىڭشە، فانيدە وزگەنى سيلامايتىن، قۇرمەتتەمەيتىن جانە وزگەدەن جاقسىلىق كورمەيتىن كىسى جوق، ءبىز - ادامنان تاراعان ءبىر وتباسىمىز.
* ادام بالاسىنىڭ تاعدىرىن باعىتتايتىن بەيمالىم، بەتپاق اقىل دا بار، ول ادال، قاراپايىم دانانى كەمسىتۋدى، مەنمەنشىل، زالىم اقىماقتى كوتەرمەلەۋدى كوكسەيدى. بەۋ، اعايىن، تاعدىرىڭ تارىنباسا، - شۇكىرشىلىك جاساي ءبىل. وزىڭمەن تەڭدەس وزگەلەر سەنەن گورى ءپاس، قيىن تىرلىك كەشىپ جۇرسە، سەن ولارعا مەيىرىمدى، جاناشىر بول.
* قانداي اڭگىمەلەردى جاڭا لەپتى دەپ ايتا الامىز؟ جالپى اڭگىمە اتاۋلىنىڭ ارعى تەگى اڭىز- مىسال عوي. ماحاببات پەن عاداۋاتتىڭ كەسكىن- كەيپى ادامزات تاريحىنىڭ العاشقى پاراقتارىندا- اق بەينەلەندى ەمەس پە؟ مىسال ەزوپتان جۇزدەگەن جىل بۇرىن جازىلعان؛ ارىستان تەرىسىن جامىلعان ەسەك كونە ەۆرەي تىلىندە باقىرعان. قۋ تۇلكىلەر ەترۋسشا جىلماڭداعان؛ قوي تەرىسىن جامىلعان قاسقىر سانسكريتشە ىرىلداعان. بۇگىنگى كۇن سول العاشقى كەزدەگىسىندەي شۋاقتى، بۇگىنگى اعاش سول كەزدەگىسىندەي جاپىراق جايىپ، ونداعى بۇگىنگى قۇستار دا سول زامانداعىلارشا سايراۋدا.
* الەم - اينا. ودان ءاربىر ادامنىڭ كەيپى كورىنىپ تۇر.
* تىم اسقاقتاپ كەتكەن جازۋشىنىڭ قۇلدىراۋى دا بولماي قويمايدى.
* جاقسى كىتاپ ادامنىڭ جانىن جادىراتادى، ەڭسەسىن كوتەرىپ، جىگەرىن جانيدى، رۋحىن قاناتتاندىرىپ، اقىلىن مولايتادى، جۇرەگىن جۇمسارتادى، جاقسىلىققا قۇمارتتىرادى.
* انا - ءسابيدىڭ جۇرەگىندەگى قۇدايدىڭ ەسىمى.
* مەن ءۇيىمنىڭ ءارقاشان ءساندى بولۋىن قالايمىن. تازا بولمەدە تۇرۋدى ۇناتامىن. ال ول ءۇشىن سىبىرتكى مەن سۇرتكىش- جۋعىش تاڭداپ اۋرە بولمايمىن.
* بۇل دۇنيەنىڭ باسپالداعى اتاقتىلار مەن بايلارعا كەڭ، وپ- وڭاي جوعارىلاتا بەرەدى. نامىستى كەدەي شىركىندەر جوعارىلاۋ ءۇشىن تىك قابىرعاعا جارماسادى، باسپالداقتا مىجعىلانادى، وتە الۋى مۇمكىن قاراڭعى دا كىر تەسىكتەرگە كەپتەلەدى، - تەك جوعارىعا اپارسا بولدى.
* ادامنىڭ قادىر- قاسيەتىن كەتىرەتىن كەمشىلىكتىڭ ەڭ جەكسۇرىنى، جيىركەنىشتىسى - مەنمەندىك.
* سوعىس ەرلەرگە دە، ايەلدەرگە دە الىم- سالىق سالادى: ەردىڭ قانىن، ايەلدىڭ كوزجاسىن الادى.
* ەگەر ءازىل كۇلدىرۋ عانا بولسا، وندا ءسىز، كلوۋننىڭ ومىرىنە ءمان بەرمەيتىنىڭىزدەي، ءازىلشى جازۋشىنى دا كورىپ- بىلۋگە ىنتىعا قويماس ەدىڭىز. ءازىل ءسىزدىڭ ماحاببات، جاناشىرلىق، كەشىرىمدىلىك سەزىمدەرىڭىزدى وياتۋدى، جەتىلدىرۋدى نىسانا ەتەدى؛ ءسىزدى وتىرىك- وسەكتەن، الداپ- ارباۋدان، جالعان اتاققۇمارلىقتان، جانى نازىكتەرگە، ەڭبەگى ەش بولعاندارعا، باقىتسىزدارعا قايىرىمسىز، مەيىرىمسىز بولۋدان ساقتاندىرادى. ول ءوزىنىڭ شاما- شارقىنا قاراي ادامداردىڭ كۇندەلىكتى تىنىس- تىرلىگىنە قاجەتتەردىڭ ەڭ ماڭىزدىلارىن ايتىپ بەرەدى. توق ەتەرى: ول - پەرىشتەنىڭ مىندەتىن اتقارۋشى.
قازاقشا سويلەتكەن عابباس قابىش ۇلى
«جۇلدىز» جۋرنالى
