شىمكەنتتە تۇرعىندار زيراتتاردىڭ باسىنا تاس قويۋعا قورقىپ ءجۇر
بۇل تۋرالى 31-ارنا حابارلايدى.
شىمكەنتتە «قايتپاس» اتالىپ كەتكەن مازاراتتان قارا ءتۇستى گرانيت تاستارى قولدى بولا باستاپتى. وتان سوعىسىندا ەرلىك كورسەتىپ، كەيىن ومىردەن وتكەن اكەسىنە قويىلعان قارا گرانيت تاستارىنىڭ جوعالعانىن كورگەن گالينا ديۋشكوۆا قاسيەتتى ورىندا ويران سالعاندارعا ايتار ءسوزىم جوق دەپ قىنجىلىپ وتىر. سوڭعى كۇندەرى كوڭىلى قوبالجي بەرگەن سوڭ، مازاراتقا كەلۋدى ءجون ساناعان. الايدا كەلگەندەگى كورىنىستەن شوشىنىپ قالدىم - دەيدى.
«كەشە تاڭەرتەڭ وسىندا كەلدىك. كورگەندە جانىمىز تۇرشىكتى. اكەم بىرنەشە كۇن تۇسىمە كىرىپ جۇرگەن ەدى. بەكەر ەمەس ەكەن»، - دەيدى شاعىمدانۋشى گالينا ديۋشكوۆا.
مازار باسىنا كەلۋشىلەر جاعى بولسا، ءتۇستى مەتالل ۇرلاۋشىلاردىڭ ەندى تاستارعا كوشە باستاعانىنا تاڭىرقاپ وتىر. «ۆاندالشىلار بۇرىن دا بولعان. ءتۇستى مەتالل مەن تاقتايشالار ۇرلاۋشى ەدى. مراموردىڭ ساپاسىنا قاراپ ءارى جۇلۋ وڭاي بولعاندىقتان، ۇرلاپ جاتقان بولار»، - دەيدى تۇرعىن ماكسيم.
ارتىنشا وقيعا باسىنا پوليتسەيلەر دە كەلىپتى. الايدا شاعىمىن تىڭداپ، جازباشا ارىزىن العان ولاردان ازىرگە حابار جوق دەيدى. وبلىستىق ىشكى ىستەر دەپارتامەنتىنە حات جىبەرىپ، باسپا ءسوز قىزمەتىنە بىرنەشە حابارلاسساق تا، تاۋلىك بويىنا حابار الۋ بىزگە دە مۇمكىن بولمادى. قارا گرانيت پەن ءمارماردان ءمۇسىن جاسايتىن ورىنداعىلار زيرات باستارىنان ۇرلانعان تاستاردى ارزان باعادا وزگە مازاراتتاعى جۇمىسشىلارعا وتكىزەدى دەيدى.
