سوتتاردىڭ قىزمەتىن ەڭ بەلسەندى جاريالاعان جۋرناليستەر ماراپاتتالدى
ءىس- شارانى قازاقستان سۋديالار وداعىنىڭ وڭتۇستىك قازاقستان وبلىستىق فيليالى قازاقستان رەسپۋبليكاسى سوتتارىنىڭ بۇقارالىق اقپارات قۇرالدارىمەن ءوزارا ءىس- قيمىل تۇجىرىمداماسىندا كوزدەلگەن مىندەتتەردى ورىنداۋ ماقساتىندا ۇيىمداستىردى. كونكۋرس اعىمداعى جىلدىڭ ساۋىرىندە باستالدى.
بايقاۋ تۋرالى اڭداتپا اقپارات وبلىستىق سوتتىڭ سايتىندا جانە وڭىردەگى مەرزىمدى باسىلىمداردا جاريالاندى. بايقاۋدىڭ ماقساتى - سوتتاردىڭ قىزمەتى تۋرالى ازاماتتاردىڭ حاباردار بولۋ دەڭگەيىن قامتاماسىز ەتۋ، سوت پروتسەسىندەگى ىستەردىڭ قۇقىقتىق ادىسپەن ءادىل شەشىلەتىنىنە سەنىمىن ارتتىرۋ جانە سۋديالاردىڭ جاڭا ادەپ كودەكسى جوباسىنىڭ ازىرلەنۋ ماسەلەلەرىنە ب ا ق- تىڭ نازارىن اۋدارۋ. كونكۋرسقا قوعامدا زاڭ ۇستەمدىگىن قامتاماسىز ەتۋدەگى سوت قىزمەتى جانە ونىڭ ءرولى، سوت پروتسەستەرىنىڭ اشىقتىعى مەن جاريالىلىعىنىڭ تاربيەلىك جانە پروفيلاكتيكالىق ءرولى، مورالدىق- ادامگەرشىلىك تاقىرىبىنداعى وچەركتەر، سوت تاۋەلسىزدىگىن قامتاماسىز ەتۋ، ولاردىڭ مارتەبەسىن نىعايتۋ، سونىمەن بىرگە، قوعام يگىلىگىنە جۇمىس ىستەپ جاتقان سوت قىزمەتكەرلەرىنىڭ اۋىر جانە مارتەبەلى ەڭبەگىن شىنايى كورسەتەتىن ماتەريالدار قابىلداندى.
ءوز سوزىندە وڭتۇستىك قازاقستان وبلىستىق سوتىنىڭ ءتوراعاسى ن. ءشارىپوۆ: «سۋديالار وداعى فيليالىنىڭ جاريالاعان كونكۋرسىنا ءساۋىر-قاراشا ايلارى ارالىعىندا 30 جۋرناليستىك جۇمىس ءتۇسىپ، ولاردىڭ ىشىنەن 6 اۆتور ۇزدىك دەپ تانىلدى. سۋديالار وداعىنىڭ وڭتۇستىك قازاقستان وبلىسى بويىنشا فيليالىنىڭ ءتوراعاسى ا. ەلشىبايەۆ، جۋرناليستەر وداعىنىڭ و ق و فيليالىنىڭ ءتوراعاسى ا. قاپباروۆا جانە و ق و بويىنشا سوتتار اكىمشىسى اقپاراتتىق قامتاماسىز ەتۋ ءبولىمىنىڭ باسشىسى ق. دۇيسەنبيدەن قۇرالعان قازىلار القاسى كەلىپ تۇسكەن ماتەريالداردى ساراپتاۋ بارىسىندا ولاردىڭ ساپاسىنا، كوكەيتەستىلىگى مەن ماندىلىگىنە كوڭىل اۋدارا وتىرىپ، جەڭىمپازداردى انىقتادى»، - دەپ اتاپ ءوتتى.
سوتتاردىڭ قىزمەتىن كورسەتۋ بويىنشا ۇزدىك اۆتور دەپ «زاڭناما» گازەتىنىڭ باس رەداكتورى ايگۇل مامىت؛ «وتىرار- TV» تەلەكومپانياسىنىڭ جانە «كاراۆان» گازەتىنىڭ وبلىستاعى ءتىلشىسى دانيل شەمراتوۆ؛ «حابار-24» تەلەارناسىنىڭ و ق و بويىنشا ءتىلشىسى قانات جۇنىسبەكوۆ؛ «ايعاق» گازەتىنىڭ باس رەداكتورى جانە «ايعاق» تەلەارناسىنىڭ ءتىلشىسى ۇلجان ناۋشابايەۆا؛ «وڭتۇستىك قازاقستان» گازەتى «زاڭ جانە زامان» ءبولىمىنىڭ مەڭگەرۋشىسى داۋلەت تۇرسىن ۇلى جانە «پانوراما شىمكەنتا» گازەتىنىڭ جاۋاپتى حاتشىسى اسەل حامزينا تانىلدى. قازاقستان رەسپۋبليكاسىنىڭ تاۋەلسىزدىگى مەرەكەسىنە وراي وتكىزىلىپ وتىرعان سالتاناتتى ءىس- شارا بارىسىندا بارلىق ۇزدىك اۆتورلارعا وبلىستىق سوت اتىنان ديپلومدار مەن ەستەلىك سىيلىقتار تابىس ەتىلدى.
