ديپلومات قىتايداعى قازاقستان تۋى جايلى قىزىقتى وقيعانى ەسكە ءتۇسىردى
ونىڭ ايتۋىنشا، بۇرىن تاجىريبە قالىپتاسپاعاندىقتان جاعداي كۇردەلى بولعان. تاۋەلسىزدىك العان ساتتە باسقا دا پروبلەمالار اراسىندا جاڭا مەملەكەتتىك سىرتقى ساياساتىن قالىپتاستىرۋ، جۇرگىزۋ وزەكتى ەدى. ءوزىنىڭ فەيسبۋكتاعى پاراقشاسىندا ول بۇرىنعى دوستارى ايتقان قىتايداعى قىزىقتى وقيعانى ەسكە الدى.
«90- جىلداردىڭ باسىندا قىتايداعى قازاقستاننىڭ ەلشىسى بولىپ مۇرات اۋەزوۆ تاعايىندالدى. ەلشىلىك اشۋ جۇمىستارى باستالىپ كەتتى. لايىقتى عيمارات تاۋىپ، كولىك، قاجەتتى زاتتار ساتىپ الۋ كەرەك بولدى. ەلشىمىز حاتتاما بويىنشا بارلىق نيۋانستاردى ساقتاۋدى تالاپ ەتەتىن العاشقى رەسمي شاراعا بارماقشى بولادى. سول كەزدە باستى كولىككە تۋ ىلىنبەگەنى بەلگىلى بولدى. ال تاۋەلسىز مەملەكەتتىڭ ەلشىسى ءوز ەلىنىڭ تۋىن ىلمەي، رەسمي كەزدەسۋگە بارۋى ەرسى جاعداي. سول كەزدە ديپلوماتتار جول تاۋىپ كەتتى. قىس كەزى، كۇن سۋىق بولاتىن. سوعان قاراماستان، ەلشىنىڭ جانىنداعى ەلشىلىك قىزمەتكەرلەرىنىڭ ءبىرى كولىكتىڭ الدىڭعى ورنىنا وتىرىپ، شاعىن كولەمدى كوگىلدىر تۋدى الىپ، تەرەزە شىعارىپ ۇستاپ وتىرعان. وسى وقيعانى قاراپ تۇرعان قىتايلىقتار بۇعان اڭ-تاڭ بولىپ ەدى»، - دەپ جازدى ول. جايناقوۆ ساعات 18.15 تە «حابار» ارناسىندا «ۇلى دالا ديپلوماتياسى» دەرەكتى فيلمى كورسەتىلەتىنىن ايتتى. وندا تۇڭعىش پرەزيدەنتتىڭ باسشىلىعىمەن قازاقستاننىڭ سىرتقى ساياساتى قالاي قالىپتاسقانى جايلى ايتىلادى.
اۆتور: حاسەنوۆا تازاگۇل
