مينيستر ارىستانبەك مۇحامەدي ۇلى جۇرتتى تاعى دا تاڭ قالدىردى

استانا. قازاقپارات - بۇگىن «استانا وپەرا» تەاترىندا ارتىستەر مەن انشىلەر تاۋەلسىزدىك كۇنىنە ارنالعان مەرەكەلىك كونسەرتكە جايباراقات دايىندالىپ جاتقان ەدى.

كەنەت ساحناعا مادەنيەت جانە سپورت ءمينيسترى ارىستانبەك مۇحامەدي ۇلى كىرىپ كەلىپ، حالىق ءارتىسى روزا رىمبايەۆاعا توسىن سىي جاسادى. مينيستر انشىگەⅡ دارەجەلى «دوستىق» وردەنىن دايىندىق ۇستىندە تابىس ەتتى، دەپ حابارلايدى قازاقپارات.

ءمينيستردى كورگەن روزا رىمبايەۆا تاڭدانىسىن جاسىرا المادى. «بۇنىڭ ءبارىن مادەنيەت ءمينيسترى ۇيىمداستىرعان شىعار. سەبەبى، مەن بۇعان دەيىن تالاي مەملەكەتتىك سىيلىقتاردى دا يەلەنگەن ەدىم. ءبىراق، ول ماراپاتتاردىڭ ءبارىن ەشكىمگە كورسەتپەي-اق، تىپ- تىنىش، كابينەتتە العان بولاتىنمىن»، - دەدى جۋرناليستەرگە روزا رىمبايەۆا.

ءانشى ماراپات تۋرالى ايتا كەلە، ول ءۇشىن ەڭ ۇلكەن سىيلىق - حالقىنىڭ سۇيىسپەنشىلىگى ەكەنىن ەسكە سالدى. «40 جىلعى رەپەرتۋارىمنىڭ نەگىزگى تاقىرىبى - وتان، وتانسۇيگىشتىك، حالىقتار دوستىعى، بىرلىك، بەيبىتشىلىك، قازاق حالقىنىڭ بايلىعى. ول اندەردى مەن ۇنەمى ەلىمىز ءۇشىن ماڭىزدى شارالاردا ورىندايمىن. مەملەكەتتىك دەڭگەيدەگى كوپتەگەن شارالار مەنىڭ انىممەن شىمىلدىعىن جابادى. سوندىقتان، بۇگىنگى سىيلىق مەنىڭ شاعىن ەڭبەگىمنىڭ باعالانعانى شىعار. ءبىراق، مەن ءۇشىن ەڭ باستى بايلىق - ەلىمنىڭ سۇيىسپەنشىلىگى»، - دەدى ر. رىمبايەۆا.

اۆتور: كەنجەكەي توقتامۇرات قىزى