كوڭىل كۇي اياق استى عايىپ بولعاندا

نۇر- سۇلتان. قازاقپارات - سىرت قاراعاندا ومىردە، ۇيدە، جۇمىستا (نە ساباقتا) بارلىعى دا جاقسى. اينالاڭىز تىمىق، بارلىعى دا كەز كەلگەن نارسەگە تۇسىنىستىك تانىتادى.

سويتە تۇرا كەيدە قىسقا كۇندە قىرىق قۇبىلىپ، كوڭىلىمىز ءوز وزىنەن قۇلازىپ، اياق استىنان ءجۇزىمىزدى مۇڭ تورلاپ الاتىن كەزدەر بولادى. نەگىزىنەن ەشكىم سەبەپسىزدەن سەبەپسىز مۇڭايمايدى. كوڭىل كۇيىمىز قاس پەن كوزدىڭ اراسىندا قايدا عايىپ بولۋى مۇمكىن ەكەنىن قاراستىرىپ كورەيىك. ءبىرسارىندى ءومىر. جايىڭىز جامان ەمەس، تۇراقتى جۇمىسىڭىز بار، نە كيەمىن، نە ىشەمىن دەمەيسىز. ءبىراق ەشقانداي ارتىق ەموتسياسىز، ەش قينالىسسىز كۇندەلىكتى قايتالانا بەرەتىن ءبىر داعدىلى ءومىر دە ادامدى تەز جالىقتىرادى. ال پسيحولوگيادا كۇيزەلىس ادامعا شىنايى ءومىردىڭ ءدامىن سەزىنىپ، بارىن باعالاۋى ءۇشىن بەرىلەتىنى دالەلدەنگەن.

شەشىمى. بۇرىن سوڭدى اينالىسپاعان ىسكە كىرىسىڭىز. جۇمىستان كەيىن ۋاقىت ءبولىپ كوپتەن كورىسپەگەن دوستارىڭىزبەن كەزدەسىڭىز. پاراشيۋتپەن سەكىرۋ، شاڭعى تەبۋ، كاۋاپ ءپىسىرۋ ءتارىزدى ىستەرمەن ءوزىڭىزدى الاڭداتىڭىز. ال جۇمىس بارىسى ونداي ارتىق قادام اتتاۋعا مۇمكىندىك بەرمەسە، جۇمىسقا قاتىستى جاڭا جوبا نە وزگە تىڭ دۇنيە ويلاپ تابىڭىز. وزىڭىزگە اشقان جاڭالىعىڭىزبەن ءبىراز اۋرەلەنىپ، مۇڭايۋ جونىندە ويلاۋعا مۇرشاڭىز كەلمەسى انىق. قوعامنان الىستاۋ، ادامدارمەن ارالاسپاۋ. ءبىر جۇمىستى اياقتاي سالا، سوڭىنان ىلە شالا كۇتىپ تۇراتىن ەكىنشى جۇمىستى اياقتاي الماي، مۇرنىڭىزدان شانشىلىپ جۇرگەندە كەي ادامداردىڭ بەت- ءجۇزىن دە ۇمىتىپ قالا جازدايمىز. ال قوعامنان جىراقتا قالعانىن سەزىنۋ، كوپشىلىكپەن ارالاسپاۋ، اسىرەسە، ايەل زاتىنا وتە اۋىر تيەدى. ومىردە ءوزىڭدى ەشكىمگە كەرەكسىز سەزىنۋدەن ارتىق جامان سەزىك جوق.

شەشىمى. قايدا بارساڭىز دا قولىڭىزدان تۇسپەيتىن تەلەفوندى وسىندايدا نەگە كۇيزەلىسكە قارسى قولدانباسقا؟ الەۋمەتتىك جەلىگە كىرىپ، قالاعان ادامىڭىزعا، ءتىپتى بەيتانىس جانعا جازىپ، سىر اقتارىڭىز. جاقىن قۇربىڭىزعا نە اناڭىزعا حابارلاسىپ، شەر تارقاتىڭىز.

وتباسىنداعى ماسەلە. كۇيەۋىڭىز نە جىگىتىڭىزبەن قارىم قاتىناسىڭىز، بىلاي قاراعاندا، تىم جاقسى. ءبىراق، نەگە ەكەنى بەلگىسىز، ونىڭ قانداي ارەكەتى بولسا دا ءسىزدىڭ جۇيكەڭىزگە تيەدى. ونى كورگەندە ءوز وزىڭىزدەن تىجىرىنىپ، تىرناق استىنان كىر ىزدەپ وتىراسىز. سىزگە جەتكىلىكتى دارەجەدە كوڭىل بولمەيتىندەي كورىنەدى. وسىدان جەك كورۋ سەزىمى، وكپە- رەنىش، مۇڭعا باتۋ باستالادى.

شەشىمى. جانىڭىزعا قاياۋ سالعان جاندى جەكە اڭگىمەگە شاقىرىپ، ىشتەگىنىڭ بارلىعىن اقتارىپ سالىڭىز. ونىڭ نە ءسىزدىڭ كوڭىل كۇيىڭىز بولماعاندا قالاي ارەكەت ەتۋ كەرەگىن اقىلداسىپ شەشىڭىز. وعان كەشكى نە تۇنگى مەزگىل جاقسى، وسى كەزدە ادام وزگەشە اشىلا تۇسەدى. ولاي ەتۋگە زاۋقىڭىز سوقپاسا، بار ويىڭىزدى، وكپە- نالاڭىزدى قاعازعا جازىڭىز. جۇپتىق ومىرگە دە وزگەرىس ەنگىزىپ، ايىنا ءبىر رەت جاڭادان وزگەشە كەزدەسۋ جاساپ تۇرۋعا شەشىم شىعارىڭىزدار. بارلىعى دا ادامنىڭ ءوز ويىنا بايلانىستى. مۇڭايىپ جۇرە بەرگىڭىز كەلە مە، كۇيىڭىزدى وزگەرتكىڭىز كەلە مە - ءبارى دە ءوز قولىڭىزدا. سىرتتان كومەك كۇتىپ جۇرە بەرگەنشە، ءوزىڭىزدى ءوزىڭىز قولعا الىڭىز.

Massaget.kz