الەپپو بيلىگى قاقتىعىستار تولىعىمەن توقتاعانىن ءمالىم ەتتى

بۇل تۋرالى رەسەي جاڭالىقتارى اگەنتتىگىنە الەپپو گۋبەرناتورىنىڭ باسپا ءسوز قىزمەتىنىڭ وكىلى اممار ەززۋ ءمالىم ەتكەن، دەپ حابارلايدى قازاقپارات.

«قالادا كەشكى ۋاقىتتان بەرى تولىق تىنىشتىق ساقتالۋدا. اتىستار تۋرالى اقپاراتتار تۇسكەن جوق. مۇمكىن ءبىر كۇن بۇرىنعىداي مەرەكەلەۋ اياسىندا ءبىر-ەكى وق اتىلعان شىعار»، - دەدى ەززۋ.

ال وقيعا ورنىنان حابارلاعان اگەنتتىك ءتىلشىسى ءارتۇرلى مالىمەتتەر بويىنشا سودىرلار ءالى دە قالىپ وتىرعان شىعىس كۆارتالداردا اۆتوماتتاردىڭ لەگى ەستىلگەن.

ءوز كەزەگىندە، وپەراتسيا شتابىنداعى دەرەك كوزدىڭ حابارلاۋىنشا، اۋماقتا قالىپ وتىرعان لاڭكەستەر مەن ولاردىڭ وتباسىلارى الەپپودان كەلىسىمگە سايكەس رامۋس باقىلاۋ-وتكىزۋ بەكەتى ارقىلى شىعارىلاتىن بولادى.

ولار ءۇشىن اۆتوبۋستار ازىرلەنىپ قويعان. «قاقتىعىستار بولىپ جاتقان جوق. قازىر بارلىعىن ەگجەي-تەگجەيلى كەلىسىپ جاتىرمىز»، - دەپ اتاپ ءوتتى ول.

بۇعان دەيىن الەپپونى لاڭكەستەردەن ازات ەتۋ وپەراتسياسى شىرقاۋ شەگىنە جەتكەن بولاتىن. سوڭعى ەكى كۇندە قالانىڭ شىعىسىنداعى بىرنەشە كۆارتال «تازارتىلدى».