بىشكەكتە ۇلى جازۋشى شىڭعىس ايتماتوۆتىڭ مەرەيتويى اتاپ ءوتىلدى
استانا. قازاقپارات - بىشكەكتە شىڭعىس ايتماتوۆ ەسكەرتكىشىنىڭ جانىندا قىرعىز حالىق جازۋشىسى شىڭعىس ايتماتوۆتىڭ تۋعان كۇنىنە ارنالعان ەسكە الۋ كەشى ۇيىمداستىرىلدى.
بۇل تۋرالى بىشكەك قالاسى مەرىنىڭ باسپا ءسوز قىزمەتى حابارلادى، دەپ جازادى كيرتاگ.
ءىس- شارانى قىرعىزستان رەسپبليكاسىنىڭ تاريحى مەن مادەنيەتى جىلى اياسىندا ش. ايتماتوۆ اتىنداعى №1 -كىتاپحانا ۇيىمداستىرعان. «ش. ايتماتوۆ اتىنداعى ورىس دراما تەاترىنىڭ اكتەرلەرى ۇلى جازۋشى مەن ونىڭ شىعارماشىلىعىن ەسكە الا وتىرىپ، «انا الاڭى» پوۆەسىنەن مونولوگ دايىندادى. بىشكەكتەگى ءبىلىم وردالارىنىڭ ستۋدەنتتەرى شىڭعىس تورەقۇل ۇلىنا ارنالعان ولەڭ شۋماقتارىن وقىدى. بارلىق تۇرعىندار مەن قوناقتارعا ارنالىپ ءتۇرلى جىلدار مەن جانرلارداعى شىعارمالار كورسەتىلگەن «الەمگە تەڭ ءومىر» كىتاپ كورمەسىن قالالىق كىتاپحانا ۇيىمداستىردى»، - دەپ ايتىلادى حابارلامادا.
ەسكە سالا كەتەيىك، شىڭعىس ايتماتوۆ 1928 -جىلى جەلتوقساننىڭ 12 سى شەكەر، قىرعىز ا ك س ر دۇنيەگە كەلگەن ويشىل گۋمانيست، داناگوي، قازاق-قىرعىزعا ورتاق حالىق جازۋشىسى، سوتسياليستىك ەڭبەك ەرى، ك س ر و مەملەكەتتىك سىيلىعىنىڭ ءۇش مارتە يەگەرى جانە لەنيندىك سىيلىقتىڭ لاۋرەاتى. قىرعىز اۋىلشارۋاشىلىعى ينستيتۋتىن بىتىرگەن سوڭ (1953) قازاقستاننىڭ جامبىل وبلىسىندا زووتەحنيك بولىپ قىزمەت اتقارعان.
1956-1958 -جىلدارى ماسكەۋدەگى جوعارعى ادەبيەت كۋرسىندا تىڭداۋشى، 1959-1960 -جىلدارى «ليتەراتۋرنىي كيرگيزستان» جۋرنالىنىڭ رەداكتورى، 1960-1965 -جىلدارى «پراۆدا» گازەتىنىڭ قىرعىزستانداعى مەنشىكتى ءتىلشىسى، 1965-1986 -جىلدارى قىرعىزستان كينەماتوگرافيستەر وداعىنىڭ ءتوراعاسى، 1986 -جىلى قىرعىزستان جازۋشىلار وداعى باسقارماسىنىڭ ءتوراعاسى، 1988 -جىلى «ينوستراننايا ليتەراتۋرا» جۋرنالىنىڭ باس رەداكتورى، 1990 -جىلى ك س ر و- نىڭ ليۋكسەمبۋرگتەگى ەلشىسى بولدى. 1991 -جىلدان قىرعىزستاننىڭ بەلگياداعى توتەنشە جانە وكىلەتتى ەلشىسى قىزمەتتەرىن اتقاردى. «ءاشىم» اتتى تۇڭعىش اڭگىمەسى 1952 -جىلى جاريالاندى. ونان كەيىن «اسپالى كوپىر» (1956)، «بەتپە بەت» (1957) تاعى باسقا اڭگىمەلەرى جارىق كوردى. جازۋشىنى العاش الەمگە تانىتقان تاڭداۋلى تۋىندىسى ايگىلى «ءجاميلا» پوۆەسى (1958).
ەسكە سالا كەتەيىك، شىڭعىس ايتماتوۆ 2008 -جىلى ماۋسىمنىڭ 10 ىندا المانيانىڭ نيۋرنبەرگ قالاسىنداعى اۋرۋحانادا ەم الىپ جاتقاندا قايتىس بولدى. 14 -ماۋسىمدا بىشكەك قالاسىنىڭ شەتىندەگى «اتا-بەييت» تاريحي- مەموريالدىق كەشەنىندە جەرلەنگەن.
