اۋىر اتلەتتەردى ريو وليمپياداسىنا وتكىزۋگە كۇش سالعان تۇسىپبەكوۆ ماراپاتتالدى - فوتو
جالپى، بۇل مەدالدى بۇگىن 100 دەن استام ادام يەلەندى. ولاردىڭ اراسىندا حالىق ءارتىسى ءجانيا اۋباكىروۆا، وليمپيادا چەمپيونى ەرماحان ىبرايىموۆ، مادەنيەت جانە سپورت ۆيتسە-ءمينيسترى اقتوتى رايىمقۇلوۆا، «قازاق فيلم» كينوستۋدياسىنىڭ پرەزيدەنتى باقىت قايىربەكوۆ، تەلەجۇرگىزۋشى ءلايلا سۇلتان قىزى، جازۋشى نەسىپبەك ايت ۇلى جانە سپورت ارداگەرلەرى مەن مادەنيەت سالاسىنا ەڭبەك سىڭىرگەن ازاماتتار بار.
مينيستر ق ر اۋىر اتلەتيكا فەدەراتسياسىنىڭ پرەزيدەنتى جانات تۇسىپبەكوۆتى ماراپاتتاي وتىرىپ، ريو وليمپياداسىنا بارعان اۋىر اتلەتتەردىڭ جەڭىسىنە توقتالدى.
«ريو وليمپياداسىنىڭ الدىندا وزدەرىڭىز بىلەتىندەي، قازاقستان سپورتشىلارى دوپينگ داۋىنا ىلىكتى. لوندون وليمپياداسى، بەيجىڭ وليمپياداسىنىڭ جەڭىمپازدارى ويىننان شەتتەتىلدى. ءتىپتى، قازاقستان قۇراماسى تۇگەل ريوعا بارماي قالا جازدادى. الايدا، وسى ادام (جانات تۇسىپبەكوۆ - اگەنتتىك) اۋىر اتلەتتەردىڭ ريو وليمپياداسىنا قاتىسۋى ءۇشىن قولدان كەلگەن كومەگىن ايامادى. يليا يلين سياقتى مىقتىلار ويىننان شەتتەتىلگەنمەن، قازاقستان ءبارى ءبىر «التىن»، «كۇمىس»، «قولا» مەدالعا يە بولدى»، - دەدى ا. مۇحامەدي ۇلى اۋىر اتلەتيكا فەدەراتسياسىنىڭ پرەزيدەنتىن ماراپاتتاي وتىرىپ.
«ەلباسى نۇرسۇلتان نازاربايەۆ «تاۋەلسىزدىك تۋىن قولدا بەرىك ۇستاۋ - ءار قازاقتىڭ ەڭ باستى بورىشى، ەڭ بيىك ماقساتى» دەپ ايتقان بولاتىن. سوندىقتان، قازاقستاندى وتانىم دەپ ەسەپتەيتىن ءاربىر ازامات تاۋەلسىزدىگىمىزدىڭ باياندى بولۋى ءۇشىن ەڭبەك ەتەدى»، - دەگەن مادەنيەت جانە سپورت ءمينيسترى ارىستانبەك مۇحامەدي ۇلى ءاربىر مەدال يەسىنە زور ەڭبەكتەرى ءۇشىن العىس ايتتى.
اۆتور: كەنجەكەي توقتامۇرات قىزى
