تاۋەلسىزدىككە تارتۋ جاسايمىز دەگەن قوس قازاق بوكسشىسىنىڭ قارسىلاستارى انىقتالدى

استانا. قازاقپارات - «تاۋەلسىزدىككە تارتۋ جاسايمىز» دەگەن قازاقتىڭ قوس كاسىپقوي بوكسشىسى باتىر جۇكەمبايەۆ پەن ابىلايحان قۇسايىنوۆتىڭ قارسىلاستارى بەلگىلى بولدى، دەپ حابارلايدى قازاقپارات ءتىلشىسى.

وسىعان دەيىن حابارلاعانىمىزداي، قوس باتىرىمىز وزدەرىنىڭ الەۋمەتتىك جەلىسىندەگى جەكە پاراقشالارىنا «16- جەلتوقسان كۇنى شارشى الاڭعا شىعاتىندارىن، بۇل كۇن ق ر تاۋەلسىزدىگىنىڭ 25 جىلدىق مەرەيتويىمەن تۇسپا-تۇس كەلىپ تۇرعانىن جازىپ، اللا قالاسا، تاۋەلسىزدىككە تاماشا تارتۋ جاسايمىز دەگەن ۇمىتتەمىز»، - دەپ جازعان بولاتىن.

اتالعان ەكى بوكسشىمىز 16- جەلتوقسان (استانا ۋاقىتى بويىنشا 17 جەلتوقسان) كۇنى كانادانىڭ كۆەبەك قالاسىندا كەزەكتى جەكپە-جەكتەرىن وتكىزەدى. باتىر جۇكەمبايەۆتىڭ (6-0, 6 KO) قارسىلاسى مەسيكالىق بوكسشى - مانۋەل مارەز.

مانۋەل مارەز 1991-جىلى تۋعان. كاسىپقوي بوكستاعى دەبيۋت كەزدەسۋىن 2010-جىلدىڭ 13- تامىزىندا وتكىزىپ، تەحنيكالىق نوكاۋتپەن ۇتقان. ال سوڭعى كەزدەسۋىن 2016-جىلدىڭ 23- قازانىندا وتكىزىپ، جەڭىلىسكە ۇشىرادى. بۇگىنگە دەيىن جالپى سانى 26 كەزدەسۋ وتكىزىپ، 16 رەت جەڭىسكە جەتىپ، 10 رەت جەڭىلگەن. 14 قارسىلاسىن نوكاۋتپەن ۇتسا، 6 قارسىلاسىنان نوكاۋتپەن ۇتىلعان.

ال ەكىنشى بوكسشىمىز ابىلايحان قۇسايىنوۆتىڭ (3-0, 3 KO) قارسىلاسى دا مەكسيكالىق بوكسشى - حەسۋس پەرەس. حەسۋس پەرەس 1990-جىلى تۋعان. كاسىپقوي بوكستاعى دەبيۋت كەزدەسۋىن 2011-جىلدىڭ 9- قىركۇيەگىندە وتكىزىپ، تەحنيكالىق نوكاۋتپەن جەڭىلگەن. ال سوڭعى كەزدەسۋىن 2016-جىلدىڭ 23- قازانىندا وتكىزىپ، جەڭىلىسكە ۇشىراعان. بۇگىنگە دەيىن جالپى سانى 17 كەزدەسۋ وتكىزىپ، 8 رەت جەڭىسكە جەتەدى، 8 رەت جەڭىلىپ، 1 رەت تەڭ تۇسكەن. 5 قارسىلاسىن نوكاۋتپەن ۇتسا، 4 قارسىلاسىنان نوكاۋتپەن ۇتىلعان.

جەكپە-جەك جان پاسكال مەن ستەپان بوجيچ اندەركارتىندا وتەدى.

اۆتور: كۇنسۇلتان وتارباي