سەرىك اقشولاقوۆ ەلىمىزدە نەيروحيرۋرگيانىڭ دامۋىنا ەرەن ەڭبەك ءسىڭىردى - ەلباسى

استانا. قازاقپارات - بۇگىن اقوردادا قازاقستان ازاماتتارىنىڭ ءبىر توبىن مەملەكەتتىك ناگرادالارمەن ماراپاتتاۋ بارىسىندا ەلباسى نۇرسۇلتان نازاربايەۆ سەرىك اقشولاقوۆ ەلىمىزدە نەيروحيرۋرگيانىڭ دامۋىنا ەرەن ەڭبەك سىڭىرگەندىگىن اتاپ ءوتتى.

 مەديتسينا عىلىمدارىنىڭ دوكتورى، پروفەسسور س. اقشولاقوۆ «ۇلتتىق نەيروحيرۋرگيا ورتالىعى» ا ق- نىڭ باسقارما ءتوراعاسى بولىپ تابىلادى، دەپ حابارلايدى قازاقپارات.

 «بيىل «قازاقستاننىڭ ەڭبەك ەرى» اتاعىمەن ماراپاتتالعانداردىڭ ءبىرى سەرىك قۋاندىق ۇلى اقشولاقوۆ. ول ەلىمىزدە نەيروحيرۋرگيانىڭ دامۋىنا ەرەن ەڭبەك ءسىڭىرىپ، وسى سالاعا باسشىلىق ەتۋدە. وتاندىق عىلىم مەن مەديتسيناعا ينۆەستيتسيالىق تەحنولوگيانى ەنگىزۋگە زور ۇلەسىن قوسىپ، ەڭبەگىمەن تەك قازاقستاندا عانا ەمەس، ءوز ماماندارىنىڭ اراسىندا، باسقا ەلدەردە دە بەلگىلى بولىپ، تالاي ازاماتتاردىڭ جانىن الىپ قالعان ادام. سوندىقتان ۇلى مەرەكە كۇنى وسىنداي ماراپاتقا يە بولىپ وتىر»، - دەدى ەلباسى.

 سونىمەن قاتار مەملەكەت باسشىسى 30 جىل بويى اۋىل شارۋاشىلىعىندا تاباندى ەڭبەك ەتىپ كەلە جاتقان «قاراسۋ» س و ك» ج ش س باس ديرەكتورى تۇرسىنوۆ المات ءجانابىل ۇلىنىڭ دا «قازاقستاننىڭ ەڭبەك ەرى» اتانعانىن اتاپ ءوتتى.

«ول باسقاراتىن كاسىپورىن ءوز ونىمدەرىن ەلىمىزدىڭ ىشىنە عانا ەمەس، سونىمەن بىرگە ەكسپورتقا شىعارۋدى دا جولعا قويعان. يننوۆاتسيالىق تەحنولوگيالاردى دا بەلسەندى ەنگىزۋ ۇستىندە. الەۋمەتتىك سالانىڭ دا دامۋىنا قولداۋ ءبىلدىرىپ كەلەدى»، - دەپ اتاپ ءوتتى نازاربايەۆ.

 اۆتور: مارلان جيەمباي